馨苓蛋白質（四十）

水火不容

細個時，每年初一，陳爸爸都會叫保羅祈禱時祝耶穌「新年快樂」，我次次都會話「耶穌係鬼佬，唔興過農曆新年」。好多人對天主教／基督教有誤解，以為信仰係「鬼佬嘢」，領咗洗就要摒棄一切傳統文化。紅日二事各種禁忌；過年睇生肖運程、趨吉避凶；拜山裝香、燒衣；甚至公司開張拜神、切燒豬。的確，好多習俗，同迷信／鬼神有關，抵觸信仰。唔同教會對呢啲事有唔同睇法，有啲嘢冇問題，有啲可免則免。當然，係咪個個教友跟足晒，又係另一回事。耶穌揸嘅係天國而唔係以色列護照，信仰同傳統文化唔一定水火不容。年三十晚除咗謝灶，仲可以去除夕謝恩彌撒，清明重陽點解唔可以為先人祈禱呢？

馨苓蛋白質（三十九）

櫃桶底

早幾年，夏洛特小公主（Princess Charlotte）領洗，英國好多人都為佢慶祝。不過，唔知佢父母有冇個個星期帶佢哋兩兄妹（哥哥喬治小王子Prince George）去教堂。如果將仔女領洗嘅相擺上臉書，相信身邊無論有冇信教嘅朋友都會「讚好」，為佢哋送上祝福。一粒種子冇人幫佢淋水施肥，自己好難生長得好。如果父母唔教仔女祈禱，唔帶佢哋去彌撒／崇拜，唔引領佢哋親近上主，一張只係放喺櫃桶入面嘅領洗紙，又係咪真係值得「讚好」呢？

馨苓蛋白質（三十八）

衣食住行

唔同人有唔同追求，錢，身份，地位，貪靚，新科技，智慧，美食，精彩人生，環遊世界……冇嘢食會餓死，冇衫著會冷病，冇屋住要訓橋底；適當嘅休息、娛樂，合理嘅生活環境、社交。一日仲生存喺世上，都有衣食住行各種需要，追求物質亦無可口非。但唔應該忘記嘅，係所追求嘅嘢，以及追求嘅過程中，到底幫緊我哋行近上主一步，定係離遠咗一步。

馨苓蛋白質（三十七）

黑暗與光明（一）

喺歷史中好長時間（大約一千年），天主教會可以話無惡不作，壞事做盡。當然，無論一間公司、民族、甚至國家咁大，總唔會個個衰，亦唔會個個好人。哥倫布1492年發現新大陸，三十年之後，1519-1521年西班牙正式佔領墨西哥。幾十年間，歐洲人以傳教為籍口，喺南美洲殺咗無數土著，搶奪佢哋嘅財產。喺非洲為啱啱捉返嚟嘅黑人施洗，就賣佢哋去南美洲嘅農場做奴隸。有啲農場甚至由神職人員經營。短短一百年，令南美洲大部份人變成教徒。保羅成日諗，如果自己係當時嘅土著，歐洲人殺我全家，搶我土地，仲捉我做奴隸，就算用槍指住個頭要我領洗，把口話信，唔通我個心會真係服咩？1531年聖母喺墨西哥瓜達露佩顯現畀一個土著。保羅唔知道呢啲事之間有冇關係，只係相信單靠刀槍，無法製造真正虔誠嘅心。

1531年12月9日，一位名為Juan Diego的土著在途經的山上遇見一位女士。她有Juan Diego一樣的深色皮膚，口說土著方言。她請Juan Diego轉告當地主教，要在此地（Tepeyac山區附近）建一座教堂。Juan Diego遵命照辦，但主教不買Juan Diego的帳，提出要聖母顯些神蹟為證，他才會相信。Juan Diego沒膽跟這位女士提主教的要求。過了三天，Juan Diego再走過附近山頭，那位女士已經在半路等他了。她沒對Juan Diego辦事不彰而生氣，只是吩咐他把山上的玫瑰花帶給主教。12月天寒地凍，按理那兒不會有玫瑰花。不料，山邊雪地上，立刻出現遍地盛開的紅玫瑰。他就把花兒包在斗篷中帶去。當他在主教面前打開斗篷，讓玫瑰散落主教腳邊時，另一神蹟出現。Juan Diego的斗篷上顯現了這位神秘女士的影像。這位女士，現在被稱為Our Lady of Guadalupe（瓜達露佩聖母）。

冰清玉潔

記得好多年前有套韓劇「醫道」，中文版主題曲頭兩句「受過傷，先知道要堅強；受委屈，先會學懂原諒」。雖然講嘅係醫德，不過套用喺罪惡上一樣可以。唔衰過，點知衰？好多唔信教嘅人都鍾意話，如果上主咁靈，點解畀咁多教徒甚至神職人員做壞事？無論有冇領洗，上主容許每個人都有機會犯罪。但正因為自己都曾受過誘惑，犯過罪，更重要係悔改過，更加明白、體諒犯罪嘅人，更加懂得同情、寬恕悔改嘅人。當然，呢個絕對唔係畀我哋任意做壞事嘅藉口。

馨苓蛋白質（三十六）

派拉特

保羅好鍾意幾年前一套卡通片──鋼之鍊金術師。當中象徵七宗罪嘅七個人造人入面，派拉特 (Pride)係一個非常難纏嘅敵人。現實中亦都一樣。龜兔賽跑嘅故事家傳戶曉，日常生活中，相信唔係好多人夠膽明目張膽式嘅認叻，但驕傲仍可不知不覺喺人嘅內心生根。心靈被「驕傲」佔據，係好可怕嘅事。唔駛人哋嘅幫助，睇唔起其他意見，唔識欣賞人哋嘅優點，以為自己啱哂，因為其他人唔聽自己話而大發雷霆。當數緊自己喺團體中立過幾多功勞嘅時候，我哋會唔會都走緊入「驕傲」嘅陷阱而不自知呢？

馨苓蛋白質（三十五）

十五二十，卅五四十

保羅記得細個時，電視會播校際辯論比賽，「中學生應否談戀愛」係其中一條成日出現嘅題目。廿一世紀嘅今日，呢條題目可能要改為「中學生談戀愛時應否有性行為」。一講「性」嘅笑話、某君嘅性醜聞，好多人都會好雀躍；但講「性」嘅道德，就即刻靜曬唔出聲，因為知道自己以前，甚至依家都有唔光彩嘅地方。「Ｘ歲都仲未破處？！」Ｘ＝１０、２０、３０、４０、５０、６０・・・ 無論男女，當貞潔唔再係美德而變成笑柄，我哋嘅社會係進步咗，定退步緊呢？

馨苓蛋白質（三十四）

現眼報（二）

有啲人鍾意咒其他人因住收尾兩年、現眼報等。但相反，唔知讀者有冇試過做咗唔啱／虧心事，一段時間後遇上倒霉、不幸，而覺得係報應？究竟兩者有冇關係，保羅真係唔知。不過如果你認為有，恭喜你，可能呢啲所謂「報應」係上主畀個機會你後悔、改過、唔好再犯。喺在世時遇到報應，總好過去到地獄門口先後悔就太遲。（現眼報（一）見２０１４年５月２７日）

馨苓蛋白質（三十三）

獨臂刀

細個時，有次跟家人去旅行。食飯時，同團嘅叔叔幫保羅裝飯，保羅唔識禮貌，竟然單手接，害得陳媽媽即刻放低筷子，雙手由叔叔度接住隻碗。聖體係基督嘅身體，領受時當然要恭敬咁雙手接住（亦可以直接用口領）。保羅唔只一次見過有好虔敬嘅人，排隊去到神父面前，跪低用口領。當然，各處鄉村各處例，有啲地方（例如孟加拉）因為左手代表不潔，所以只用右手單手領聖體。至於保羅自己，有時亦會單手，唔係因為不敬，而係當老婆唔得閒一齊去聖堂時，要左手抱埋囡囡一齊上前，唔敢留低佢一個喺位。

馨苓蛋白質（三十二）

遲啲先（三）

有次去睇一個關於生死嘅展覽，會場放咗好多唔同款嘅棺材，其中最令保羅深刻嘅係幾副為小朋友而設嘅棺材。作為父母，見到咁嘅情景特別感觸。基督教冇嬰兒領洗呢回事。相反，天主教鼓勵父母喺嬰兒時期就帶仔女領洗。大部份冇咁做嘅父母，原因都係話留返畀佢哋第日大過自己揀。人生無常唔係只適用於長大後，如果我哋真心相信領洗可以幫助人升天堂，點解仲要遲啲先呢？

馨苓蛋白質（三十一）

遲啲先（二）

保羅鍾意放假去屋企附近一間茶餐廳食早餐。有次，一個大嬸伙記問保羅，係咪星期日去附近教堂聽彌撒，因為佢都有，仲認得保羅添。原來佢因為帶仔女返主日學，十幾年嚟個個星期都會去教堂，不過自己就一直冇信教，直至兩年前先領洗。傳教係一件好易令人灰心嘅工作，因為失敗率太高。不過信仰嘅種子以唔同方法散落到人嘅心，會唔會／幾時會發芽冇人知。最後，分享一個真人真事笑話。身邊一個前輩，以前會去監獄教囚犯道理。曾經有個學生第一堂就同佢講：「你唔好以為我想信耶穌呀！我貪呢間房有得涼冷氣咋！」

遲啲先（一）

保羅身邊有長輩，因為食糖尿病藥，三餐唔準時就會頭暈。亦有啲人，因為關節退化，彎底身會膝頭痛，甚至行動不便，要坐輪椅。好多人接觸信仰後，對於更進一步，因為唔同理由，都會話「遲啲先、退休後」。四旬期教會鼓勵守齋；拜苦路，要又跪又企；甚至「主的晚餐」，神父彎底身幫人洗腳。其實能夠守齋，因為仲年青力壯；可以跪底祈禱，表示仲行得走得。日復日、年復年，會唔會到訓喺病床，插著喉唔郁得先叫最遲呢？

我愛旅行在萬有之上（二）

香港打工仔出名大假少，好多人請大假，都會連住公眾假期，可以去長啲同遠啲嘅旅行。除咗農曆新年，比較長嘅假期就只有復活節同聖誕節。為咗去教堂，而冇得去旅行，好多教友都會即刻反彈話萬萬不能。但如果我哋真係愛天主在萬有之上，下次計劃行程時，可唔可以將平安夜子夜彌撒／復活節三日禮儀加入做考慮嘅因素之一呢？

馨苓蛋白質（三十）

我愛旅行在萬有之上（一）

好多人鍾意去旅行，每年嘅大假一日都唔會嘥，必定用盡去世界唔同角落。以前，保羅同大部份教徒一樣，喺第二個國家，就會唔記得星期日要去教堂，彷彿教友身份，好似件衫一樣，除低咗就冇咗。曾經有神父話，好多教友揾佢辦告解，話自己下星期會去旅行聽唔到彌撒。今時今日，上網咁方便，又有Google Map，外地教堂地址、彌撒時間噤幾個制就有，如果咁都話去唔到，究竟我哋愛天主，定愛旅行在萬有之上呢？

馨苓蛋白質（二十九）

你呃人（二）

現代社會，好多權威受到挑戰，例如皇帝、政府、法律，宗教嘅權威當然亦冇例外。今時今日，凡事要有理據，否則閻羅王都冇面畀。講服從，就會被視為冇獨立思考、盲從、被利用。上主畀人好多戒命遵守，雖然教理上，每條戒命都有背後原因，但就算呢啲「原因」都變得無效，係咪就代表戒命唔駛遵守。舉個例，一個好衰嘅父母，自小將仔女拋棄，從來冇養育之恩。到仔女長大發咗達，雖然感情上未必可以孝順咁嘅父母，但係咪代表可以要父母做自己工人，斟茶遞水，打打鬧鬧？上主叫阿當唔准食禁果，唔係因為個蘋果爛、有毒、唔好食，而係代表畀一條戒命人去遵守。就算個蘋果又靚又好食又有營養，呢條仍然係一條戒命。

馨苓蛋白質（二十八）

你呃人（一）

今時今日，人人都話要批判性思考，樣樣嘢要理據。講信仰宗教，好易被標籤為落伍、守舊、反現代等。權威方式教誨，唔好話教學生，就算教仔女都過時。同人講上主嘅權威，好多時對方把口話尊重你個人取態，實際上心裡笑你傻仔、咁都好信。每當有心硬嘅人問點証明世上有神、有天堂地獄、話呢啲好似細個阿媽帶去虎豹別墅，嚇我講大話會畀牛頭馬面勾脷筋，只係呃細路、已經有各種「實驗」証明世上冇神…面對呢啲問題，以保羅有限嘅智慧當然啞口無言。就算有１００歲命，都總有結束嘅一日，到時邊個去到先，睇完返嚟同對方講，咪知有冇呃人，依家拗嚟有乜意思。只可惜正如聖經話齋，如果係要唔信，就算死人復活返嚟同佢講都冇用。

馨苓蛋白質（二十七）

免死金牌

老人家一般都怕做身體檢查，驚住會驗到有事，彷彿冇醫生「話」自己有，個病就唔存在。好多人加入信仰都係希望可以升天堂。不過有啲人因為知道自己有唔好嘅生活方式同習慣，改唔到，明知唔符合教會嘅教導，所以選擇唔信教，驚住會落地獄。如果我哋嘅一言一行，係會令到自己落地獄，而又唔肯去改，無論領唔領洗，一樣都係落地獄。相反，如果只要唔相信就可以有免死金牌，咁嘅「地獄」仲值唔值得我哋去相信？

馨苓蛋白質（二十六）

拜神雞

記得細個有一次臨過年前，保羅跟陳媽媽去街市買雞，老闆以為我哋買嚟拜神，就話隻雞之前因為同其他雞打交，背脊受傷花咗，問我哋介唔介意。舊約時代，猶太人都會揀隻「無瑕」嘅羊，確保冇傷痕冇斷腳先攞去獻祭。今時今日雖然唔駛再獻羊，不過每個人都可以將日常嘅生活奉獻畀上主。既然係祭品，當然要做好自己一言一行，唔好攞隻發臭嘅雞嚟還神。

馨苓蛋白質（二十五）

肌肉不調症

保羅由細到大都係運動白痴，手、腳、眼協調得好差。不過就算係運動健將，身上都有一舊最難控制嘅肌肉──條脷 (舌頭)。講大話、搬是非、擦鞋、冤枉、粗口、侮辱、抵賴、詆毀甚至淫邪，通通都同條脷有關。試問邊個夠膽話可以完全馴服到自己條脷。食咗污穢嘅食物可能都係痾幾日，但喺口度出嚟嘅污穢，可以永遠都補救唔返。

馨苓蛋白質（二十四）

成副身家（下）

早幾年，藝人陳嘉桓懷疑被陳浩民、馬德鐘等非禮。事後，有人提出捐錢畀公益金（有說係東華三院），以表示誠意向當事人道歉。曾經睇過一篇文章，提及有啲人因為自知做過唔啱嘅事（例如年輕時用不良手法搵錢），到年老時希望透過捐錢、做善事作為補贖。有將功補過嘅心當然係好事，社會亦的確有好多需要幫助嘅人。不過如果只係想藉捐錢贖罪，但從冇諗過真心悔改，就算捐哂成副身家，對自己嘅靈魂又有咩益處呢？

馨苓蛋白質（二十三）

成副身家（上）

最近幾年，微軟創辦人盖茨呼籲其他富豪學佢一樣，捐出全副身家，幫助有需要嘅人。當然，就算普通人（包括保羅自己），都唔係個個有咁嘅決心同勇氣。伊斯蘭教有個講法，我哋對其他人嘅施捨，其實都係先經過真主嘅手。因此唔應該只係捐出自己多餘／冇用嘅，反而要將自己覺得好嘅／鍾意嘅攞出嚟。曾經有調查話*，香港人捐錢比率全世界排名第９，平均６４％人喺一個月內有捐過錢，但就只有１３％人有做義工（捐出時間）。究竟係反映香港社會富裕，好多人有閒錢可以捐，定係我哋覺得時間比錢更寶貴，所以唔捨得捐呢？

（*Charities Aid Foundation – World Giving Index 2012）

未夠班

保羅從來都唔敢將自己同「虔誠」兩個字扯上任何關係，如果有人問保羅有幾虔誠，我會答話１００分，不過滿分係１００００。唔係因為謙虛，而係自己知自己事，做過嘅錯事醜事，就算只係用細明體Font 1寫出嚟，都應該厚過本聖經。而且，知衰同改唔改到，又係兩回事。身邊有啲朋友，喺保羅眼中係好虔誠嘅人。不過佢哋好多都會話自己只係得閒祈吓禱、去吓教堂，唔算得上虔誠。有信仰嘅人，從來都唔等於係聖人，相反只係知道自己做過好多衰嘢，希望改過嘅人啫。

馨苓蛋白質（二十二）

聾耳陳

保羅通常睇電視都開得好細聲，雖然係咁，不過因為慣咗，所以一樣聽得好清楚。老婆成日投訴：「咁細聲邊聽到？都唔知你開嚟做乜！」相反地，好多人用耳筒聽歌，不自覺開到好大聲，漸漸聽覺變得冇咁靈敏。個個人天生都有一夥良心，每次想做唔道德嘅事，良心可能都會強力反抗，但如果成日充耳不聞，久而久之，良心嘅聲音就會越嚟越弱，最後甚至完全消失，覺得冇問題，做咗壞事仲沾沾自喜，以為自己好叻，所有嘢都係應份。良心一旦泯沒，悔改之心亦會不翼而飛。耶穌話世上所有嘅罪都可以被赦免，唯獨褻瀆聖神／聖靈嘅罪就唔可以。所指嘅唔係講粗口褻瀆上主，而係唔願意悔改嘅人。

馨苓蛋白質（二十一）

冇膽匪類 （三）

好多人自翔醒目仔，睇嘢睇全局，唔會被表面愚弄。認為宗教係愚昧，有信仰嘅人係儍仔，被宗教領袖利用、洗腦，甚至作為斂財工具。的確，呢啲事喺歷史中出現過好多。保羅唔敢話自己比起講呢啲話嘅人叻；亦不得不承認，今時今日仍然有好多騙局打著宗教作仿子。但當以為自己嘅聰敏，可以勝過上主嘅愚妄時，我哋真正拒絕緊嘅，到底係神棍嘅謊言，定係神嘅箴言呢？

馨苓蛋白質（二十）

冇膽匪類（二）

好多人視有信仰嘅為弱者，宗教只係心靈空虛者嘅慰藉、精神鴉片，畀失意嘅人好過啲。自問係强者，又何須宗教？的確，經驗中，喺宗教場所入面，有相當比例都係長期病患、傷殘人仕或佢哋嘅家人，老人家，窮人等被視為弱者嘅人。但係，講呢翻話嘅人往往忘記咗，就算上主嘅懦弱，都遠勝於人嘅堅強。