唔少人生活、工作中，都試過好心冇好報，甚至惡報。因為誠實，損失利益／機會；一念之仁，遭過橋抽板、反咬一口。見人哋稍稍放下道德，雖然未必名成利就，但起碼事半功倍。覺得蝕底咗，被笑戇居，甚至付上沉重代價。亦有啲雖然未至十惡不赦，但借人嘅善良達成目的、求個方便。因為驚被利用、保護自己，開始唔理道德、忘記良知。小撮人嘅劣行，漸漸個個唔肯／唔敢再做好人。羊走咗入狼群中，仲要靈巧如蛇，同時保持白鴿咁馴良，談何容易？
好多人都問，領咗洗係咪唔再拜祖先。的確，除咗祈禱，未必個個基督教／天主教徒肯燒衣上香。保羅自己，兩樣都會，希望佢哋收到嘅，唔係乳豬金銀，而係一份心。為亡者祈禱，都係想佢早登極樂。先人冇領洗，升天堂定落獄，真係上主至知。今時今日，冥鏹祭品花款越來越多，點心壽司、保健食品、甚至電腦手機。不過，與其燒副麻雀俾佢，不如在生陪佢打多四圈好過。
細個果陣，有一年學期初，老師叫保羅做班長，保羅拒絕，因為唔鍾意擇同學名，結果佢只好搵第二個。有個故仔係咁嘅，先知約納／約拿被揀選去尼尼微城叫人悔改，佢唔肯，仲諗住搭船走佬，點知遇到風暴。水手為咗保命，將佢掉落水。之後，被條大魚吞入肚，三日三夜，最後終於屈服先出得返嚟。如果上主要你為佢做一件事，千祈唔好以為自己走得甩。
之前睇過一單新聞，武漢有人喺動物園爬過圍欄，偷天鵝蛋。事後仲話生咁多隻，唔攞走啲，其他可能會孵唔出。除咗特首鍾意用語言偽術，好多人都會幫自己搵藉口。自私就話人不為己，天誅地滅；濫交係追尋浪漫、生理需要；色情變成情色；迷信係求安心；市儈勢利，因為個個都係咁。久而久之連藉口都慳返，做乜嘢都係理所當然。喺我哋笑偷蛋賊嘅同時，會唔會有一日發現自己都係咁？
