馨苓蛋白質（五）

庸才定人才

好多人都知，天主教同基督教其中一個分別，就係神父冇得結婚，但做牧師可以。神父唔結得婚，因此，順理成章主教都係單身。不過喺東正教，情況好唔同。神父可以揀結唔結婚，但主教就一定要係單身。因此，主教只可以喺獨身或老婆已經死咗嘅神父中選出。保羅冇正式研究過，但網上資料話，雖然守獨身喺東正教受到崇高尊敬，但九成神父都會結婚。於是有人問，咁樣會唔會限制咗可以成為主教人選嘅人才庫（Talent Pool）？但係，如果要講人才，耶穌一開始就揀晒啲又醒又高學歷嘅人做門徒啦，點會輪到啲冇乜讀過書嘅漁夫呢？（十二門徒中，起碼有五個係漁夫：大雅各伯／雅各、伯多祿／彼得、安德肋／安德烈、若望／約翰、斐里伯／腓力）

馨苓蛋白質（四）

最大傻瓜

身邊一個老伯伯最近畀人扼，無端端掙銀行一大筆錢，結果臨老先要將住咗幾十年嘅屋賣咗嚟還債。雖然係咁，但喺聽佢講翻呢件事時，保羅完全唔覺佢對個騙子有一絲憎恨。扼佢嘅唔係職業騙徒，而係佢自己個仔。做父母真係天下間最傻嘅事，出錢、出力、出心之餘，有時仲會好似呢個伯伯咁被反咬一口。可惜保羅自己都加入咗呢個傻瓜行列。身邊好多人都好著重仔女嘅教育，但係就算學曬珠心算、七種樂器同八國語言，而唔識孝順父母、尊師重道，為佢哋又有咩益處？

馨苓蛋白質（三）

一樣米養百樣人

幾年前，有個人因為遇到意外，需要緊急換肝。冇耐後，一個唔識佢嘅消防員話肯捐半個肝出嚟，當時大部份傳媒都讚呢個消防員。仲記得嗰日，保羅同一位長輩一齊睇電視新聞，佢即時反應係呢個消防員梗係搏升職，唔係邊有咁好心。筆者唔識當事人，當然唔知真相係點。保羅自問都算幸運，冇乜唔好嘅經歷，因此諗嘢較正面。世態炎涼，人人各有際遇，因此思考方式唔同。不過我哋點睇其他人，某程度上其實都反映自己係咩人。

馨苓蛋白質（二）

唔係世界末日

「絕罰(Excommunication)」係天主教對犯咗極嚴重罪行（如謀害教宗，蓄意褻瀆聖體、墮胎等）最高處罰，受絕罰者禁止領受任何聖事，一般殺人放火都未至於會受到絕罰。好多年前喺一個網上論壇，一位女士話希望入天主教。不過細個時因年少無知，畀人搞大個肚，之後聽阿媽講去深圳墮胎。身邊嘅天主教朋友同佢講，如果佢領洗，就會受絕罰，因此唔知點算。咁多年嚟，保羅一直唔明，點解一個人想接近上主（領洗），反而會受絕罰。唔通為佢，唔領洗仲好？好多年之後，保羅先明白自己諗漏一件事。領洗唔單止係「入會儀式」，更重要係一個人痛悔以前做過唔啱嘅嘢，赦免之前嘅罪。最後補充一點，受「絕罰」並唔等於世界末日，只要真心悔改，經主教／教宗批准一樣可以得到寬恕。

馨苓蛋白質（一）