憤怒小鳥（一）

近年，好興講「陰謀論」，凡事要睇全局，唔好被表面蒙蔽；踢爆、揭發背後嘅目的、詭計、慌言；搵出事件背後，邊個策劃、邊個煽動、邊個從中得益。提出、支持陰謀論嘅人，彷彿好似醒啲、高人一等。陰謀論吸引之處，係樣樣嘢似是而非，永遠無法否定或肯定。了解實情、唔好輕易判斷，本來唔係壞事，但過份懷疑、猜忌，好容易引發仇恨、對立，令人與人之間嘅紛爭難以化解。當不知不覺間成為陰謀論嘅信徒時，我哋係咪應該諗吓，到底自己宣揚緊嘅係仇恨定仁愛呢？

馨苓蛋白質（十二）

賞味期限

喺領匯(0823)未上市之前，某啲公共屋邨商場舖位長期丟空，原來因為幾十年前規定要租畀特定行業，例如寫信佬。好多人話聖經嘅道理已經不合時宜，例如冇話唔畀走私運毒、超速駕駛，更加唔好話電腦世界、網上罪行等。的確，如果用法律／規則嘅角度睇，聖經就好似一件包裝袋寫著已經過咗期二千年嘅食物，應該冇人敢食。但正如十誡之中只有「不可殺人」，唔通代表聖經容許打到人重傷，只要對方冇死到就得咩？

馨苓蛋白質（十一）

我是Ｘ國人

填申請表、入境表，好多時都有國藉一項，填乜嘢，代表我哋當自己係咩人。天國冇移民政策，想入境出境，係每個人自由嘅意志。香港有３６萬人有天主教領洗紙（另外，根據政府統計，仲有４８萬基督教徒）。但揸住領洗紙，唔等於有天國居留權；冇嘅亦唔一定會被拒絕入境。如果心裡面都冇當自己係基督徒，把口話自己咩國藉又冇咩意思呢？

馨苓蛋白質（十）

飽暖思淫慾

好多無神論者都會話，如果上主係仁慈嘅，點解咁多天災人禍，令無辜者受害。呢個問題連教宗都唔識答（參考方濟各２０１５年１月１５至１９日訪問菲律賓時，與一名女孩對話），保羅當然唔敢認叻。不過，所謂「飽暖思淫慾」，人就係咁犯賤，無憂無慮時好容易就會忘記上主，生死關頭先識「臨急抱佛（主）腳」。上主無保證日日都係天晴，信仰本身就唔係只睇現世生命嘅幸福美滿，虔誠唔係趨吉避凶嘅護身符（十二門徒中除咗若望／約翰，十一個都係慘死）。保羅成日都諗，如果每個人都豐衣足食，我哋又點識同情憐憫，仲邊需要幫助其他人。

盡力而為

身邊信教嘅朋友，雖然唔係個個會，不過部份都有帶仔女去教堂，但究竟有幾多會教小朋友祈禱，保羅冇問過。認識一啲教友，本身好虔誠，年青時都有帶仔女聽彌撒／崇拜，不過啲細路長大後，就冇再喺教堂出現。保羅唔敢話自己一定做得到，不過囡囡仲係ＢＢ階段，已嘗試同佢一齊祈禱，講聖經故仔畀佢聽。雖然知佢唔明，有時仲會百厭搣爛本聖經，但起碼第日保羅死咗，耶穌問起，都有得交差。至於佢大個會唔會變咗ＣＥＯ教友，保羅控制唔到。將種子擺喺佢嘅心，係父母嘅責任，但發唔發芽只有上主先知。只係，如果自己本身都唔祈禱，又點可以教到小朋友祈禱呢？