馨苓蛋白質（九）

有感而發

突然有感而發，睇返首次執筆寫＜陳保羅口水監控中心＞，原來已經係０９年１１月嘅事。中間曾經停咗超過３年，直到２０１３年１２月底，由雅虎博客轉去Blogger，先叫正式重新開始。最初以為囡囡出世後，再冇時間寫文章，但自從２０１５年起，反而比之前發表得密咗。保羅唔敢講所寫嘅嘢一定啱，有時亦多謝網友指正錯漏。雖然「讚好」、回應唔多，但偶然同人傾開，先知原來對方都有睇。既然講心靈、宗教，每當見到身邊朋友嘅心硬、無信，見到社會上嘅物質主意、功利、淫亂等，保羅都會感到好氣餒、好痛心，反問自己會否太幼稚，寫本欄係咪好多餘。究竟到邊一日，我再冇時間同能力繼續落去呢？保羅都唔知。

馨苓蛋白質（八）

一本旁身，世界通行

近年因為政治、生活環境、教育等，多咗人為仔女將來而考慮移民。又或者本身有外國戶藉嘅，會想傳畀下一代。隨著仔女長大，保羅身邊都有唔少人為咗入學，帶小朋友領洗，當中有幾多會真心追隨基督，相信得上主先知。相反，亦有啲教徒朋友，想留返仔女第日自己揀，而唔帶佢哋領洗。因為知道外國護照係好嘢，父母會千方百計傳畀仔女，咁點解我哋唔會想將天國嘅護照傳畀佢哋呢？

馨苓蛋白質（七）

賺蝕輸贏

之前寫過一編關於爭拗嘅文章（＜辯論＞２０１０年３月２日），後來因為覺得唔滿意，趁由雅虎博客轉為谷歌Blogger時，乾脆抽走。宜家以同一主題，重新寫過。

身邊唔少人，喺宗教上同保羅持唔同意見。由最簡單嘅基督教天主教之爭，有神冇神論，西方信仰同中國文化矛盾，甚至各種陰謀論等。有啲因為一知半解，亦有時係惡意挑釁。以前，保羅好勝，鍾意同人爭拗。但礙於知識有限，往往被問到口啞啞。正係呢個原因，激發保羅多去問，多去睇。認識多咗，先發現自己嘅無知。漸漸，保羅唔再爭拗，反而傾向同人解釋。當然，有時就算係標準答案，唔等於個個接受，但起碼得個知字。一場交贏輸，只代表邊個口才出眾，頭腦靈活。學習上主嘅道理，真正重要嘅，應該係賺取人嘅心。

馨苓蛋白質（六）