好多恐怖片，形容有６６６標記嘅魔鬼，化身公仔或細路，製造假意外、真陰謀，戲中角色唔係慘死，就身首異處。有時又話佢係妖怪，鍾意食人吸血、濫殺無辜。結局一般寫主角尋找聖物，將佢消滅／封印。魔鬼係咪同人一樣，有壽命、老咗會死，保羅唔知。不過就算係，應該唔止用一百幾十年做單位，畢竟自有人類開始，佢就喺度。即使會衰老，宜家可能仲係壯年，精力充沛，否則我哋早就天下太平。既然大把時間，今日殺一個人，同幾十年後等佢病死，有乜分別。與其千方百計取人性命，不如諗吓點樣引人犯罪，投向自己，收歸旗下好過。
成日聽人話香港天主教老化，相比好多地方，已經唔算太嚴重。就保羅眼見，除咗朝早七點幾嘅彌撒，其他時段，雖然唔係好多，起碼叫做有啲後生仔。基督教祟拜，形式較活潑，青年仲多啲。有次去瑞士，保羅喺日內瓦去教堂，望勻曬，除咗隔離個修女，自己竟然係全場最後生嗰個，其他都係阿公阿婆。曾經有神父投訴，話香港啲青年晚晚成兩點先訓，邊可能第二朝七點起到身。不過，嗰次保羅已經係去九點彌撒。
幾年前，保羅去巴黎旅行，星期日到聖母院聽彌撒。一入門口諗住熄電話，可能因為中國人面孔，被人以為係遊客叫我唔好影相。喺歐洲，好多教堂同修道院又靚又宏偉，吸引大量遊客參觀。雖然未至於將聖殿搞到變賊藪，不過當教堂變成旅遊景點；十字架變咗手信，除咗影相放上臉書、到此一遊，有幾多人會記得喺上主面前打咭呢？
俾讀者估吓，西班牙同比利時分別有71%同57%人係天主教，但星期日幾多會去教堂，文尾開估。香港３８萬天主教徒，每年新增三千幾個大人領洗。可惜曾經聽過，話呢三千人，五年內八成會流失，以後唔見咗（實際數字保羅查唔到）。初初可能個個星期去彌撒，漸漸一個月一次，整整吓得翻聖誕復活，最後影都冇埋。「我們的心豈不是火熱的嗎﹖」（路24:32）係忙、懶、攰、當初信教另有目的、喺教堂遇到不愉快經歷，定其他原因撳熄呢團火？最後，西班牙2012年得14%人會去主日彌撒。比利時1998年仲有11%，到2009年淨翻5%！（香港情況見＜不要做CEO教友＞(2013年4月7日)）
