今日所講嘅割包皮，即係古代嘅割損禮／割禮。舊約聖經規定男仔出世後第八日就要割包皮。猶太人視割包皮為信仰嘅象徵，無割就唔係自己人。瑪加伯時代（約公元前二百至三百年），以色列被希臘統治，希臘人鍾意搞運動會（即係今日奧運會嘅前身），但參加者都係光脫脫（情況就好似今日見到啲古代石像咁）。有冇割包皮，一目了然。當時希臘人奉行多神論（即係今日常講嘅希臘神話，宙斯、阿波羅、雅典娜等），同猶太人嘅一神論互不相容，因此有冇割包皮成為兩族鬥爭嘅原因。好多猶太人選擇放棄信仰，用懸掛重物延長嘅方法，令包皮重生，好使佢哋藉運動會，埋希臘人堆。亦有部份猶太人為捍衛信仰，寧死都堅守割包皮嘅傳統。慶幸新約時代，班門徒喺一次宗教會議上寬免咗外國人割包皮嘅要求，否則今日所有信教嘅男人都不能幸免一刀。身體上嘅割損省卻咗，但心中嘅割損卻免不得，而且更重要。所講係有一個愛德嘅心，當然，領咗洗唔等於有愛德。有心乜都得，冇心割乜都假。
２０１３年１１月３０日
