I am Alpha (Α) and Omega (Ω)

聽前輩講，好多今日喺教會熱心嘅長者，當年都係所謂「奶粉教友」。幾十年前，生活艱苦，好多人因為教會有奶粉派，唔知乜頭乜路領咗洗。雖然，十個攞咗奶粉，可能九個之後都冇影。到依家，仍然有好多人因為有「著數」（例如入學、結婚等）而信教，甚至其他地方（如喀嘜隆、孟加拉等）、其他宗教（如印度人由印度教改信伊斯蘭教）都有類似情況。耶穌醫好十個痳瘋病人後，問唯一返嚟多謝佢嗰個：「潔淨了的不是十個人嗎？那九個人在那裏呢？」對好多人嚟講，領洗嗰日，就係佢哋離開教會嗰日。

來電顯示

如果有一日電話響，來電顯示係上主打嚟（當然唔係指惡作劇），唔知讀者有咩反應。雖然唔係好多，不過保羅身邊都有幾個（男女、天主教、基督教都有）回應召叫，選擇神職人員道路嘅人。２０１２年喺美國，有人做過一個調查，訪問一群１４歲以上，未結婚，又表示冇諗過做修女嘅女性，睇吓佢哋背後嘅原因。（保羅暫時未搵到男性、基督教類似嘅調查）結果如下：

合作無間

睇電視，好多時啲罪犯搵人幫手都會話：「又唔係殺人放火，你淨係做ＸＸ啫・・・」彷彿只要冇出手，就唔關自己事。係宗教上，有樣嘢叫「與罪惡合作」。睇水、幫手出主意、教唆犯罪、縱容身邊嘅人（仔女、家人、朋友、伴侶等）做錯事、因為溺愛而變成是非不分、克意偏袒／隱瞞，甚至引誘人犯罪，其實仲衰過綁著舊大石喺自己條頸然後跳落海。雖然冇直接參予，但唔代表喺上主面前可以走得甩。

巨無霸餐

差唔多全世界都有麥當勞。雖然每個地方總有唔同，不過有啲「鐵膽」例如巨無霸、薯條、汽水，度度都一樣。喺外國聽彌撒，雖然語言不通，但係由於程序大致相同，都可以估到講到邊。甚至只要揸著中文禮儀書，同一日內，全世界都係用緊同一編經文。正如麥當勞一樣，因著同一嘅基督，無論喺元朗定深水埗，札幌定達卡，都可以食到一樣配方嘅巨無霸。

彌撒禮成

有聽過彌撒嘅讀者，唔知有冇留意，每次彌撒，最多人回應嗰句，一定係最尾神父講完「彌撒禮成」之後嘅「感謝天主」。因為終於搞掂，可以走得。好多人（包括保羅自己）都試過喺聖堂時，唔專心，雲遊四海，甚至恰眼訓。相比基督教祟拜，天主教彌撒好似好悶、好死板。對於初初開始聽彌撒嘅人，好多儀式同動作，都唔知做緊乜，又點會有興趣再去？曾經聽人講笑話，問香港人攞一千蚊，甚至要佢剝一隻牙，可能仲易過叫佢畀一個鐘頭出嚟。但問心，除咗呢個鐘，成個星期，我哋又有幾多時間留畀上主？

身在福中（四）

全球最多天主教徒嘅國家，頭三位依次係巴西、墨西哥同菲律賓。分別為1.4億、1.2億同7,000萬。不過人多唔等於神父多。全世界十二億天主教徒，大約有４１萬個神父，平均3,000人一個。可惜呢三個國家，神父比例低得可憐，都係八千幾九千人先有一個。神父比例喺157個國家（地區）中，分別排139、138同143。有趣嘅係，頭十個神父比例最高嘅國家（地區），竟然有５個都喺亞洲（尼泊爾(第二)、巴勒斯坦(第三) 、日本(第五) 、台灣(第九)、泰國(第十)）。當然，呢啲地方嘅神父，可能好多都係外國嚟傳教。或者，真係先知喺自己鄉下都係唔受歡迎嘅。

身在福中（三）

＜身在福中（三）＞

之前講過，全世界平均3,000個天主教徒先有一個神父。至於主教，全球大約5,100個（包括樞機、主教、助理主教、輔理主教等），即平均２４萬人先有一個。喺外國，並唔係個個堂區都有駐堂神父。例如美國17,000個堂區中，就有3,500個冇（約２０％）。睇返香港，現時大約有374,000天主教徒，301個神父，同五個主教（陳日君、湯漢，另加三個輔理主教）。即係1,200人對一個神父，75,000人對一個主教。相比全世界，我哋都算好幸福。

身在福中（二）

如果只係睇神父數目，由1970年到2014年，四十幾年間，大約都係４１萬左右，好似冇乜嘢。（雖然正如之前講，期間天主教徒對神父比例，高咗一倍。）不過，如果睇埋修女／修士數目，就真係好得人驚。由1970年，大約108萬（修女100萬，修士8萬），到2014年得返76萬（修女70.5萬，修士5.5萬）。即係四十幾年內，減少３０％。

身在福中（一）

成日都聽到話唔夠神父，保羅喺網上搵到啲資料，等讀者了解吓依家嘅情況。由1970年到2014年，全世界神父大約都係維持喺４１萬個左右。不過同期教友數目，就由六億半增加一倍到超過１２億，即係話，以前平均1,500人就有一個神父，到今日，一個神父要服務差唔多三千人。「好彩」今時今日，會個個星期去教堂嘅人，越來越少，所以啲神父先冇咁忙。

衰十一

提起犯罪，好多人即刻諗到殺人放火、偷扼擄騙、傷天害理嘅事。不過就算一個動作、做咗／冇做一啲事、一句說話、甚至一個念頭、一個思想、冇去教堂、冇守齋，即使唔影響他人，一樣可以係犯罪。基督教冇告解，只要真心悔改、祈禱就得，感覺上好似容易啲。天主教／東正教要搵神父辦告解，話畀佢知做過乜，求上主寬恕。（雖然實際上，好多教友上次辦告解，都唔知係幾多十年前嘅事）如果係唔小心、一時疏忽，講出嚟都好聽啲。但要親口話自己因為自私／貪心／咸濕／妒忌，特登做一件事，的確幾難啟齒。聽過有人話，有冇認真辦告解，係睇會唔會講到自己都唔好意思。相信好多人衰過嘅，又點止十一樣咁少。

合資格人士

睇武俠片，好多時都有類似對白：「你呢種卑鄙小人，唔配做我哋華山派弟子！」彷彿一個人私德有問題，就唔配係某個身份。另一方面，今時今日好多嘢都會訂明，邊啲人有資格申請ＸＸ（福利、職位、權利、參加某啲活動等）。好彩直到今日，暫時仲未有人質問保羅：「你咁嘅人，有咩資格信教，耶穌咁教你架咩？你配做教徒咩？」如果要講資格，講配唔配，全世界都應該冇人有資格，冇人配跟隨基督。

堅毅力行

身邊好多人（因為種種原因）都會畀年幼嘅仔女領洗，不過，就唔係好多會個個星期帶佢哋去教堂。同ＢＢ／小朋友去教堂，好小事就會被迫遲到早退；為咗睇實佢哋，個幾鐘禮儀，自己真正投入嘅，可能少過十五分鐘。細路仔冇耐性，又跑又跳，大叫大喊，父母尷尬，又怕嘈著隔離。平日照顧仔女，已經冇覺好訓，難得放假仲要一早起身、攞苦嚟辛，究竟為乜？如果唔係有無比毅力，可能晨早放棄咗。作為旁人，與其怪責呢班小魔怪，騷擾自己與神同行，唔係更應該對佢哋父母嗰份堅持，至萬二分敬意咩？

沒有天主的天主教

曾經睇過一本書，係有關天主教黑暗時期最差嗰啲教宗。（由伯多祿／彼得到宜家，二千年嚟總共有二百六十幾人做過教宗）姦淫擄掠、殺人放火、謀朝篡位，諗得出同諗唔出都有。失去咗天主嘅天主教，讀者中熟悉歷史嘅，一定仲清楚過保羅。「連天主你都不怕嗎？」心裡冇天主嘅教宗、唔祈禱嘅主教、自己唔辦告解嘅神父、唔睇聖經嘅執事尚且可以變成咁，何況冇咗天主嘅政府、團體、個人呢？

傳統智慧

中國人話「槍打出頭鳥」。好多人（包括保羅自己）細個屋企都教唔好多管閒事，漸漸養成怕事嘅性格，遇到唔啱嘅嘢唔敢出聲。當然，明知有危險，冇理由仲夾硬逞強。曾經睇過一則伊斯蘭聖訓話「如果見到安拉（真主）不讚許的事，就用手來阻止它，如果不能用手來阻止，就用舌頭，如果不能用舌頭來阻止，就用心來厭惡。」喺選擇沉默，然後拍片擺上網、數臭當事人之前，係咪應該反問當時真係覺得安全會受威脅，定係俾藉口自己開脫心裡面嘅懦弱呢？

南丫四號

聽過一個比喻，有個老細請人去佢公司打工，規定到十二點每人出一個金幣糧，有人晨早開工做足成日，有啲成十一點先嚟，做一粒鐘就收工。結果每人都得到一個金幣。於是，做得耐嗰啲梗係唔高興，冇理由做十個鐘同一粒鐘都係咁多錢，咁咪好唔抵？有一次，保羅同個冇信仰嘅朋友吹水，佢話如果宜家就開始信教，好多嘢唔准做，好蝕抵，所以希望臨死前先覺悟就最著數。前幾年，南丫島發生撞船意外，３９人浸死咗。保羅相信嗰３９人，出事前５分鐘都應該冇諗過自己會死。

食生菜

曾經睇過一齣古裝片，有個人因為犯法，被拉咗去祠堂受審。村長要佢發誓從實招來，仲警告菩薩面前唔可以講大話。喺教堂行婚禮，承諾終生不渝；幫仔女領洗，答應會帶領佢哋信仰嘅道路。但係，喺同二奶鬼混緊嗰陣，或者知道仔女入到心儀學校之後，又有幾多人仲會記得當日食過嘅生菜呢？

吹我唔脹

現代社會，講求法律。唔犯法，鍾意做乜都得。一腳踏幾船，冇問題；有外遇，冇犯法；說話做事，令人哋痛心欲絕，跳樓燒炭，唔關我事。法律唔准虐待仔女、體罰學生，冇話要孝順父母、尊師重道。甚至犯咗法，冇人見到、唔被人捉到、告我唔入，就吹我唔脹。奉公守法，可以免於坐監罰款，但守咗法律，係咪就可以肆無忌憚？

吹水唔抹咀

殺人放火唔係個個會試，但呃人、扮嘢、口不對心，好多人（包括保羅自己）每日或多或少都唔知做幾多。有啲無傷大雅，淨係取個方便，有時卻利害攸關。語言偽術同說話技巧，往往係一線之差。廣東話「說謊」叫「講大話」，彷彿只係同大事有關。喺芝麻綠豆小事上「講細話」，係咪就冇問題？大人教小朋友要誠實，好可惜甚至連華盛頓斬櫻桃樹都可能係慌話一則。有篇令人痛心嘅文章指出，講大話係人類應有之惡，細路仔如果超過某個歲數都唔識，可能要懷疑係咪智商有問題。「是就說是，非就說非；其他多餘的便是出於邪惡」，真正做到嘅人，又有幾多？