有聽過彌撒嘅讀者，唔知有冇留意，每次彌撒，最多人回應嗰句，一定係最尾神父講完「彌撒禮成」之後嘅「感謝天主」。因為終於搞掂，可以走得。好多人（包括保羅自己）都試過喺聖堂時，唔專心，雲遊四海，甚至恰眼訓。相比基督教祟拜，天主教彌撒好似好悶、好死板。對於初初開始聽彌撒嘅人，好多儀式同動作，都唔知做緊乜，又點會有興趣再去？曾經聽人講笑話，問香港人攞一千蚊，甚至要佢剝一隻牙，可能仲易過叫佢畀一個鐘頭出嚟。但問心，除咗呢個鐘，成個星期，我哋又有幾多時間留畀上主？
全球最多天主教徒嘅國家，頭三位依次係巴西、墨西哥同菲律賓。分別為1.4億、1.2億同7,000萬。不過人多唔等於神父多。全世界十二億天主教徒，大約有４１萬個神父，平均3,000人一個。可惜呢三個國家，神父比例低得可憐，都係八千幾九千人先有一個。神父比例喺157個國家（地區）中，分別排139、138同143。有趣嘅係，頭十個神父比例最高嘅國家（地區），竟然有５個都喺亞洲（尼泊爾(第二)、巴勒斯坦(第三) 、日本(第五) 、台灣(第九)、泰國(第十)）。當然，呢啲地方嘅神父，可能好多都係外國嚟傳教。或者，真係先知喺自己鄉下都係唔受歡迎嘅。
