牆頭草

有次啱啱完咗彌撒，聖堂門口撞到個教友，竟然問保羅有冇興趣報名學紫微斗數。喺瑪加伯時代（約公元前200至300年），部份猶太士兵會戴住邪神嘅符籙上戰場，祈求可以平安返屋企。今日唸天主經／主禱文，聽日去車公廟，後日玩塔羅牌。唔理邊個，總之保佑到自己順順利利，生意興隆就得。聖經將背棄上主嘅人，比喻做紅杏出牆嘅新娘。如果咁計，好多人何止包二奶／公，甚至有阿三、阿四添。正如關二哥出名講義氣，萬一俾佢知道有啲牆頭草嚟上香俾自己，唔知會點諗？

超級巨聲

通常彌撒／祟拜中歌詠團／詩班，因為有練習，一般都唱得唔差。不過最美麗嘅聲音唔係佢哋，而係教堂入面，ＢＢ／細路仔因為肚餓／唔舒服發出嘅喊聲。對於小朋友（甚至大朋友），彌撒／祟拜有時都幾悶，坐唔定、郁身郁勢，在所難免。如果話帶仔女去教堂，需要嘅毅力，比堅持自己嘅信德大一百倍，應該都冇誇張。個幾鐘禮儀，最終聽到嘅，可能四份一都冇。有時因為被喊聲打斷，集中唔到，可能會覺得討厭。但如果冇咗呢啲小生命，會唔會有一日我哋都變成歐洲咁，得翻啲阿公阿婆去教堂呢？

擁有哈巴谷之恩

舊約其中一位先知哈巴谷，相傳好有音樂造詣，係聖殿中嘅樂師。保羅曾經喺彌撒度見過由一班癱瘓、痙攣、智障人士組成嘅歌詠團，雖然唔算好好聽，不過睇見佢哋唱每一個音，都要出盡九牛二虎之力，真係令人幾感動。細個讀經濟科，學過「比較優勢 (Comparative Advantage)」。個個人唔同嘅長處，天主教叫做「神恩」。雖然未必好超卓、世界冠軍，但無論係傷殘人士定哈巴谷，只要盡自己擁有嘅，一樣可以服務上主。

假如何俊仁係天主教

早排，何俊仁因為喺立法會睇靚模性感相，被網民封為「ＡＶ仁」、「何盡淫」，甚至叫佢辭職落台。可惜佢唔係天主教，否則就可以即刻去辦告解，然後大大聲向指責佢嘅人話：「今日我真心悔改，雖然唔代表以後一定可以對抗誘惑，但既然天主都寬恕我，你哋憑乜嘢去判斷我呢？」告解聖事可貴嘅地方，在於只要真心悔改，無論犯嘅罪有幾大，都可以得到寬恕。當然如果喺告解亭入面口是心非，就算扼到面前嘅神父，都扼唔到佢背後嘅天主，辦幾多次都冇用。