你呃人（二）

現代社會，好多權威受到挑戰，例如皇帝、政府、法律，宗教嘅權威當然亦冇例外。今時今日，凡事要有理據，否則閻羅王都冇面畀。講服從，就會被視為冇獨立思考、盲從、被利用。上主畀人好多戒命遵守，雖然教理上，每條戒命都有背後原因，但就算呢啲「原因」都變得無效，係咪就代表戒命唔駛遵守。舉個例，一個好衰嘅父母，自小將仔女拋棄，從來冇養育之恩。到仔女長大發咗達，雖然感情上未必可以孝順咁嘅父母，但係咪代表可以要父母做自己工人，斟茶遞水，打打鬧鬧？上主叫阿當唔准食禁果，唔係因為個蘋果爛、有毒、唔好食，而係代表畀一條戒命人去遵守。就算個蘋果又靚又好食又有營養，呢條仍然係一條戒命。