水火不容

細個時，每年初一，陳爸爸都會叫保羅祈禱時祝耶穌「新年快樂」，我次次都會話「耶穌係鬼佬，唔興過農曆新年」。好多人對天主教／基督教有誤解，以為信仰係「鬼佬嘢」，領咗洗就要摒棄一切傳統文化。紅日二事各種禁忌；過年睇生肖運程、趨吉避凶；拜山裝香、燒衣；甚至公司開張拜神、切燒豬。的確，好多習俗，同迷信／鬼神有關，抵觸信仰。唔同教會對呢啲事有唔同睇法，有啲嘢冇問題，有啲可免則免。當然，係咪個個教友跟足晒，又係另一回事。耶穌揸嘅係天國而唔係以色列護照，信仰同傳統文化唔一定水火不容。年三十晚除咗謝灶，仲可以去除夕謝恩彌撒，清明重陽點解唔可以為先人祈禱呢？