好多人誤解宗教，以為好似防疫針，打咗就百毒不侵，一世虔誠，唔再犯罪。萬一仍然行差踏錯（有時甚至係神職人員），就梗係枝針冇效，既然如此，駛乜信教。其實信仰只係指條路你行，唔掂時可以搵人（神）幫手。打個比喻，由中環去小西灣，要經軒尼詩道、英皇道、柴灣道等。但教咗你唔等於去到終點，因為你仍有權揀唔行、特登倒轉行、甚至行行吓被其他嘢（誘惑）吸引，去咗第二度。所以去唔去到小西灣，要一生努力。試諗吓，出賣耶穌嘅猶達斯／猶大都係日日同佢一齊。當然，冇信仰，可以賴自己唔識，信咗教仲明知故犯，就罪加一等。
如果原始人嚟到現代，第一次見到㩒電制會著燈，一定以為呢個係神蹟，檔我哋神咁拜。但當佢發現原來盞燈邊個㩒都一樣，相信就唔會再檔係一回事。神蹟，我見過，而且唔只一次。保羅同好多人一樣，試過身邊好愛好尊敬嘅人有病，希望為佢祈禱有奇蹟令佢好翻，但結果佢都係死咗。諗返轉頭（雖然唔知啱唔啱），如果個個祈禱就一定要有神蹟，同㩒電制就會開著盞燈有乜分別？當變成理所當然，我哋仲會唔會檔神蹟係神蹟？
