小人不記大人過（二）

俗語話「大人不記小人過」，但有時邊個係「大人」，邊個係「小人」，只係觀點與角度。喺一段仇恨中，人好容易就認定自己係「君子」，對方係「小人」。但就算對方１００％錯晒，自己１００％啱晒，單係唔願意和解呢點，已經足以証明「對錯」唔係一面倒。無論道歉定原諒，先行出第一步嗰個唔代表認輸，只係代表佢著緊對方感受啫。

冇天理

聖經寫耶穌小朋友時嘅事好少，只知佢阿爸若瑟做木匠。喺當時，只有有錢人先會用木製傢俱，一般人求其用舊石或爛木做枱凳就算。由於服務嘅都係有錢客戶，佢屋企應該唔會太窮，可能係小康添。不過畀客拖數唔係今日先有，兩千年前，交咗貨收唔到錢，兼被打一身應該係好平常嘅事。保羅諗，如果自己係若瑟遇到呢啲事，會唔會好委屈，覺得冇天理，甚至有一刻對上主氣餒、失望呢？雖然上主就喺屋企，等佢放工返嚟。小朋友嘅耶穌，見到唔開心嘅阿爸，到底會好窩心咁錫返佢一啖，定係只會大叫大嚷，叫人同佢唱歌歌，畀佢食零食呢？保羅想講嘅係「冇天理」唔係今日先有，即使上主與我哋同在，唔代表就會事事都「有天理」，因為負責定有冇天理嗰個，唔一定要今世就計清條數。

小人不記大人過（一）

保羅細個時都唔知同幾多個人絕過交，好彩依家好多都仲係朋友。年紀越大，越難同人和解／道歉。雖然好多人基於禮貌，開口「唔好意思」，埋口「對唔住」。不過要真正同自己唔啱牙嘅人和解，恐怕係另一回事。聖經話如果獻祭前諗起有人得罪咗自己，要先去同佢和解，再返嚟獻過。今時今日，雖然我哋已經唔駛再去燒隻羊或者牛嚟獻祭，（如果唔係應該都幾貴）但有幾多人，唔好話人哋得罪咗自己，就算自己唔啱得罪咗人，會同對方和解咗先祈禱／去教堂呢？

９９％對１％

金融海嘯期間，紐約發生佔領華爾街事件，其中一個議題係有關９９％對１％。（財富高度集中於極少數人口）香港３８萬天主教徒（佔人口大約５％），但只有六至八萬會個個星期去教堂。如果以七百萬人計，差唔多一百人，先得一個。今時今日，相信好多人同保羅一樣，臉書有幾百甚至過千個「朋友」。如果咁計，即係平均每個人身邊，會星期日聽彌撒嘅人，十隻手指都數得哂。

拍烏蠅

天主教要求教友每年最少辦一次告解。全世界十一億教徒，只有大約44萬個神父。假設大部份人都係星期日去教堂時辦，一年52個禮拜，平均每個神父每星期要聽48個告解。如果辦一次告解要5分鐘，即係神父逢星期日要坐喺告解庭4個鐘以上先掂。但事實係，就保羅眼見，坐喺告解庭入面嘅神父好多時都拍烏蠅，無人「幫襯」。