鬼怪，好多人都怕。就算把口話唔驚，當喺陌生環境，三更半夜，自己一個，都可能會不寒而慄。「寧可信其有，不可信其冇」。七月十四梳起髮陰；入到酒店房講「唔好意思」，搬新屋前拜四角。不幸地，上述嘅事，連好多教友（包括天主教同基督教）都會做。當然，如果恃著有信仰，想試探耶穌，專登接觸邪靈，死咗都無得怨。不過既然有真理做腰帶，正義作盔甲，信德做盾牌，如果都仲驚，係咪應該檢討吓平日有冇著好自己副武裝？
細個讀物理學過計加速率同時間，知道一個人由２０樓跳落街，大約要３．４６秒。十誡中嘅殺人罪（天主教第五誡／基督教第六條）包括自殺。好多年前，保羅去一個基督教朋友喪禮。當時心諗，為佢祈禱都又有咩用，因為自殺升唔到天堂。直到最近先明白，自己唔係信仰判官，唔應該判斷他人，免得反被判斷。但願３．４６秒足夠佢真心痛悔。
