合資格人士

睇武俠片，好多時都有類似對白：「你呢種卑鄙小人，唔配做我哋華山派弟子！」彷彿一個人私德有問題，就唔配係某個身份。另一方面，今時今日好多嘢都會訂明，邊啲人有資格申請ＸＸ（福利、職位、權利、參加某啲活動等）。好彩直到今日，暫時仲未有人質問保羅：「你咁嘅人，有咩資格信教，耶穌咁教你架咩？你配做教徒咩？」如果要講資格，講配唔配，全世界都應該冇人有資格，冇人配跟隨基督。

堅毅力行

身邊好多人（因為種種原因）都會畀年幼嘅仔女領洗，不過，就唔係好多會個個星期帶佢哋去教堂。同ＢＢ／小朋友去教堂，好小事就會被迫遲到早退；為咗睇實佢哋，個幾鐘禮儀，自己真正投入嘅，可能少過十五分鐘。細路仔冇耐性，又跑又跳，大叫大喊，父母尷尬，又怕嘈著隔離。平日照顧仔女，已經冇覺好訓，難得放假仲要一早起身、攞苦嚟辛，究竟為乜？如果唔係有無比毅力，可能晨早放棄咗。作為旁人，與其怪責呢班小魔怪，騷擾自己與神同行，唔係更應該對佢哋父母嗰份堅持，至萬二分敬意咩？

沒有天主的天主教

曾經睇過一本書，係有關天主教黑暗時期最差嗰啲教宗。（由伯多祿／彼得到宜家，二千年嚟總共有二百六十幾人做過教宗）姦淫擄掠、殺人放火、謀朝篡位，諗得出同諗唔出都有。失去咗天主嘅天主教，讀者中熟悉歷史嘅，一定仲清楚過保羅。「連天主你都不怕嗎？」心裡冇天主嘅教宗、唔祈禱嘅主教、自己唔辦告解嘅神父、唔睇聖經嘅執事尚且可以變成咁，何況冇咗天主嘅政府、團體、個人呢？

傳統智慧

中國人話「槍打出頭鳥」。好多人（包括保羅自己）細個屋企都教唔好多管閒事，漸漸養成怕事嘅性格，遇到唔啱嘅嘢唔敢出聲。當然，明知有危險，冇理由仲夾硬逞強。曾經睇過一則伊斯蘭聖訓話「如果見到安拉（真主）不讚許的事，就用手來阻止它，如果不能用手來阻止，就用舌頭，如果不能用舌頭來阻止，就用心來厭惡。」喺選擇沉默，然後拍片擺上網、數臭當事人之前，係咪應該反問當時真係覺得安全會受威脅，定係俾藉口自己開脫心裡面嘅懦弱呢？

南丫四號

聽過一個比喻，有個老細請人去佢公司打工，規定到十二點每人出一個金幣糧，有人晨早開工做足成日，有啲成十一點先嚟，做一粒鐘就收工。結果每人都得到一個金幣。於是，做得耐嗰啲梗係唔高興，冇理由做十個鐘同一粒鐘都係咁多錢，咁咪好唔抵？有一次，保羅同個冇信仰嘅朋友吹水，佢話如果宜家就開始信教，好多嘢唔准做，好蝕抵，所以希望臨死前先覺悟就最著數。前幾年，南丫島發生撞船意外，３９人浸死咗。保羅相信嗰３９人，出事前５分鐘都應該冇諗過自己會死。