我在隔音室的日子系列 ＜Joyeux Noël（二）＞

執筆之時，保羅唔計小說，已經發表咗過百篇文章。曾經有一段好長時間，點激率最高嘅一直都係「不要做CEO教友」（大約維持咗四年半，紀錄直到２０１７年１０月先被打破）。呢篇文章雖然喺２０１３年４月７日刊出，但直到現在，檢查瀏覽記錄時，仍發現間中都會有人睇。舊年，保羅曾經買過薑餅人請囡囡食，估唔到佢一直記住，於是保羅應承今年「將臨期」再買畀佢。每年聖誕，我哋好多時都會同身邊嘅人講「聖誕快樂」。不過保羅更加希望教識囡囡，聖誕嘅快樂，唔係只係嚟自薑餅人。

我在隔音室的日子系列 ＜Joyeux Noël（一）＞

外國好興Advent Chocolate（如果照字面譯係「將臨期朱古力」，「將臨期」保羅通常理解為「即『將』來『臨』嘅時『期』」，亦即係聖誕節前嘅四個星期）。香港雖然臨近聖誕有啲舖頭都有賣Advent Chocolate，不過暫時仲未算好流行。Advent Chocolate通常一盒有廿幾粒，每粒有一個數字，可以係１至２４。等小朋友由１２月１日起，一日食一粒，直到１２月２５日，期望聖誕節來臨。（順帶一提，天主教嘅將臨期唔一定係１２月１日開始，例如２０１６年嘅將臨期係由１１月２７日開始）。好多人都好期待聖誕節，不過我哋期待嘅，除咗禮物、開派對、聖誕大餐，仲有冇其他嘢呢？標題嘅英文翻譯：「Joyful Christmas」

我在隔音室的日子系列 ＜Le Pere, le Fils et l'Esprit＞

今次標題用法文，文末開估。囡囡好鐘意用左手，無論畀玩具佢，同佢畫圖畫，定筷子食嘢，佢都多數會用左手攞。係咪真係左優，暫時未知。陳爺爺好唔高興，成日都話要教返囡囡用右手。為咗用左手定右手，保羅同陳爺爺嘈過好多次。有一次，保羅想教囡囡分左同右，諗起好多阿媽都會話「揸筷子嗰隻係右手，揸碗嗰隻係左手」咁點教佢好呢？於是同佢講：「我哋用右手劃十字聖號。」最後標題嘅英文翻譯：「the Father, the Son and the Spirit」。

我在隔音室的日子系列 ＜Je crois en un seul Dieu（三）＞

喺隔音室之中，好多父母都有多過一個仔女。保羅最高紀錄遇過一家庭，大哥同我講佢六歲，側邊嘅細佬妹分別四歲、兩歲半，再加埋訓喺BB車入面最細嗰個，一共有四個小朋友。好多時聽到身邊嘅教友朋友話唔知點樣帶仔女去教堂，保羅雖然冇講出口，不過心入面都會沾沾自喜，誇耀自己有本事可以個個星期都帶囡囡去。不過只要諗吓其實隔音室裡面嘅每對父母，好多仲唔止帶一個豆丁去添，自己又有幾巴閉呢？

我在隔音室的日子系列 ＜Je crois en un seul Dieu（二）＞

（承上文）老實講，保羅嗰刻個心都有啲飄飄然，覺自己好似立咗大功咁。囡囡開始學坐廁所。每次佢成功喺廁所尿尿，我哋都會鼓勵話：「囡囡好叻叻喎！」有一次，保羅放底佢喺廁所後，行開攞啲嘢，返嚟時佢同保羅講：「爸Ｂ，好叻叻！」原來係提醒保羅唔記得讚佢。信德唔係由人而嚟，當中嘅「人」亦都包括我哋自己。白白得嚟嘅嘢又有乜好誇耀呢？

我在隔音室的日子系列 ＜Je crois en un seul Dieu（一）＞

保羅去開嗰間教堂設有隔音室，等小朋友聽彌撒時唔怕騷擾到其他人。不過由於隔音室唔係好大，有時可能同一時間有五六個小朋友（家庭），所以入面都幾嘈，大人好難專心。有一次，當大部份家長都只係望住自己仔女，好似忘記咗係聽緊彌撒，外面啱啱唸緊信經，保羅於是細細聲跟住唸。點知，全場靜哂，之後大家跟住一齊唸……標題法文嘅英文翻譯：「I believe in one only God」

第十一個義人

陳爸爸好鍾意挑剔生活中好多人好平常，但又做得唔係太啱嘅事，保羅有時都冇佢咁好氣。有一次，保羅寸佢話：「可能香港就係因為有你同深水埗明哥，加埋夠十個義人，所以先咁多年都相安無事。」（參閱 ＜創18:16-32＞）陳爸爸回答保羅：「咁我都希望加埋你，變成有十一個啦。」究竟香港／地球係咪真係因為有十個義（好）人，所以咁耐都冇畀上主毀滅，保羅真係唔知。不過每個人都有權選擇自己做唔做第十一個義人。

＜創18:32＞亞巴郎／  亞伯拉罕說：「求我主且勿動怒，容我最後一次進言：假如在那裏（索多瑪和哈摩辣／所多瑪和蛾摩拉）找到十個（義人）怎樣﹖」他（上主）答說：「為了這十個（義人）我也不毀滅（索多瑪和哈摩辣／所多瑪和蛾摩拉）。」

幾句關於寬恕的話

只有曾經被人寬恕，先會明白得到寬恕嘅喜悅。我哋寬恕得罪我哋嘅人，猶如人哋寬恕我哋一樣。縱然唔係每一個我哋得罪過嘅人，都會肯寬恕我哋。

小人不記大人過（二）

俗語話「大人不記小人過」，但有時邊個係「大人」，邊個係「小人」，只係觀點與角度。喺一段仇恨中，人好容易就認定自己係「君子」，對方係「小人」。但就算對方１００％錯晒，自己１００％啱晒，單係唔願意和解呢點，已經足以証明「對錯」唔係一面倒。無論道歉定原諒，先行出第一步嗰個唔代表認輸，只係代表佢著緊對方感受啫。

冇天理

聖經寫耶穌小朋友時嘅事好少，只知佢阿爸若瑟做木匠。喺當時，只有有錢人先會用木製傢俱，一般人求其用舊石或爛木做枱凳就算。由於服務嘅都係有錢客戶，佢屋企應該唔會太窮，可能係小康添。不過畀客拖數唔係今日先有，兩千年前，交咗貨收唔到錢，兼被打一身應該係好平常嘅事。保羅諗，如果自己係若瑟遇到呢啲事，會唔會好委屈，覺得冇天理，甚至有一刻對上主氣餒、失望呢？雖然上主就喺屋企，等佢放工返嚟。小朋友嘅耶穌，見到唔開心嘅阿爸，到底會好窩心咁錫返佢一啖，定係只會大叫大嚷，叫人同佢唱歌歌，畀佢食零食呢？保羅想講嘅係「冇天理」唔係今日先有，即使上主與我哋同在，唔代表就會事事都「有天理」，因為負責定有冇天理嗰個，唔一定要今世就計清條數。

小人不記大人過（一）

保羅細個時都唔知同幾多個人絕過交，好彩依家好多都仲係朋友。年紀越大，越難同人和解／道歉。雖然好多人基於禮貌，開口「唔好意思」，埋口「對唔住」。不過要真正同自己唔啱牙嘅人和解，恐怕係另一回事。聖經話如果獻祭前諗起有人得罪咗自己，要先去同佢和解，再返嚟獻過。今時今日，雖然我哋已經唔駛再去燒隻羊或者牛嚟獻祭，（如果唔係應該都幾貴）但有幾多人，唔好話人哋得罪咗自己，就算自己唔啱得罪咗人，會同對方和解咗先祈禱／去教堂呢？

９９％對１％

金融海嘯期間，紐約發生佔領華爾街事件，其中一個議題係有關９９％對１％。（財富高度集中於極少數人口）香港３８萬天主教徒（佔人口大約５％），但只有六至八萬會個個星期去教堂。如果以七百萬人計，差唔多一百人，先得一個。今時今日，相信好多人同保羅一樣，臉書有幾百甚至過千個「朋友」。如果咁計，即係平均每個人身邊，會星期日聽彌撒嘅人，十隻手指都數得哂。

拍烏蠅

天主教要求教友每年最少辦一次告解。全世界十一億教徒，只有大約44萬個神父。假設大部份人都係星期日去教堂時辦，一年52個禮拜，平均每個神父每星期要聽48個告解。如果辦一次告解要5分鐘，即係神父逢星期日要坐喺告解庭4個鐘以上先掂。但事實係，就保羅眼見，坐喺告解庭入面嘅神父好多時都拍烏蠅，無人「幫襯」。