說明書

買部新電器返屋企，有人會好有心機，睇曬成本說明書；有啲冇乜耐性，用咗先算。冇睇唔等於一定會用壞部機；相反地，睇咗都可以搞到一塌糊涂。每當知道身邊有信仰嘅人，甚至神職人員行差踏錯，好多人都會擰曬頭，認為信唔信教都係一樣，不外如是。其實，信仰就好似人生嘅說明書，冇睇唔等於衰梗、落地獄；睇咗，一樣可以走歪路，無得升天堂。可唔可以功德圓滿，係要一生嘅努力。

買匵還珠

有句成語叫「買匵還珠」。「匵」（音＂讀＂）即係盒。話說有個商人為咗想粒珍珠賣得高啲價錢，於是造咗個好靚嘅盒裝著，一套咁賣。點知有人買咗之後，淨係鍾意個盒，還返粒珍珠畀老闆。好多人領洗，只係睇到教會嘅學校、福利機構、氣氛、友情等，反而忘記咗最寶貴嗰粒珍珠，其實係基督本身。

刀山火海

唱情歌成日都講犧牲，為情人，可以點偉大、點轟烈。現實中，唔好話要生要死，就算雞毛蒜皮，真係要做時，會唔會改口話有心無力？小朋友成屋玩具，講笑叫佢送個陀螺畀我，可能最多只肯攞個爛嘅出嚟。無關重要，梗係冇所謂，要入肉入心時，有幾多人肯？唔痛，又點算犧牲？「人人為我，理所當然；我為人人？咪搞！」可能係好多人唔敢講出口嘅心聲。「人單獨不好」唔淨止因為悶、冇人傾偈冇人陪。得一個人嘅話，點會學識體諒、包容同犧牲？

Document 1

保羅細個，有時會整蠱其他朋友仔，同人講講吓嘢，突然話「耶穌喺你後面喎」，嚇到對方好驚咁向後望。大部份人一生冇見過神，最多只係透過一啲經歷，感受到佢存在。唔信有神嘅，一般都話因為冇見過。對其他人嘅見証，認為係心理作用、巧合、潛意識等。亦有啲人，原本唔信，當見過神跡、異象、甚至耶穌顯現後，從此改變咗。如果有信德，每次見到祝聖嘅麵餅，耶穌已經喺我哋面前；如果有信德，兩三個人一齊祈禱，佢就喺中間。但冇信德嘅話，就算佢喺你面前顯現，都會以為撞鬼。