小朋友一個下午，可以打交、錫翻、「唔採你」、和好、喊完、笑翻好多次。但成年人，一句話、一個眼神、一個動作，產生嘅心病、怨恨、不和、誤解、猜忌，可以永遠化解唔到，越整越深。保羅同其他人一樣，有自己睇唔順、唔鍾意、有過節、唔想見嘅人。諗返轉頭，又冇殺我全家，有咩血海深仇唔放得低？愛自己嘅仇敵、寬恕七十個七次，講就容易。把口話原諒、一筆勾銷，心裡始終有刺，碰面會面阻阻。一朝被蛇咬，十年怕草繩。人與人嘅信任，好長時間先建立到，但幾秒就可以完全摧毀。如果拯救地球就要消滅曬啲敵人，會唔會有一日自己變咗要被消滅嗰個呢？
有啲嘢，例如食煙、賭錢、飲酒、睇三級片，兒童不宜，因為驚佢哋沉迷，唔識自制。亦有啲事，好似講粗口、奢侈浪費、貪慕虛榮、怕辛苦等，冇犯法，但家長會教仔女唔應該。小賭怡情、淺賞即止、舒緩壓力、個個係咁、人有我有、貪求方便、為世所迫，每個人總有各自嘅藉口。上述嘅事好多教友都做唔少，只係既然對小朋友有害，點解大人做又會有益？
早幾年，保羅同以前一班教會朋友食飯，講起聽彌撒，有啲好耐冇去，有啲就間中去吓。好多人年少、讀書時曾經都好熱心、好虔誠，但大個咗，出嚟做嘢後，越來越冷淡，最後冇埋影。見嘅事闊咗，識嘅人多咗，經歷世態炎涼、爾虞我詐，覺得信仰愚昧、幼稚，可能講中好多人心聲。保羅細個同其他小朋友一樣，唔鍾意，聽唔明，覺得好悶，但個個星期父母都捉我去教堂。成日都話要俾小朋友到耶穌跟前，唔通大人就唔駛？
同好多人一樣，保羅有時都好怕同啲極虔誠嘅人（不論天主教定基督教）講嘢，覺得唔自在，甚至反感。（希望保羅自己唔係其中一個其他人會驚咗我嘅）所以「耶穌」兩個字，保羅好少講，最多只係「寫」。社會越發達，信仰越低落。香港成日話貧富懸殊，但起碼多數人唔駛擔心生命安危（最多都係驚食得唔好，住得太細）。一講「耶穌」，好多人都耍手擰頭。好地地，佢拯唔拯救我，咪又係咁；得永生但中唔到六合彩有咩用？正如播種，唔係粒粒會開花結果。傳教只係做本份，冇話保證有收成，因為信仰唔係單憑人嘅智慧。種子會唔會、幾時先會發芽，永遠冇人知。十年、廿年，甚至到對方臨死前一刻都唔定。相反，我哋今日收割嘅，可能亦係前人種落嘅。
