保羅最近心血來潮，有興趣在網上搜尋關於“聖經密碼“的事。（如果讀者唔知聖經密碼係乜，可以參考本文最後的＂聖經密碼簡介＂）保羅從來冇睇過“聖經密碼“本書，只係睇下網上相關嘅資料，但越諗越覺得有問題。假設天主／上帝真係喺聖經加入密碼，以下情況唔知會點：
首先，保羅雖然唔識希伯來文，但知道都係好似英文咁由字母組成。因此英文字母ＡＢＣ，都可以有對應嘅希伯來文字母。鬼佬（如牛頓 (Isaac Newton））就話可以有個準確Ｄ的希伯來文名啫，但中國人、韓國人等又點呢？假設＂陳保羅＂個名會出現在聖經密碼中，究竟會用＂Paul Chan＂、＂Chan Po Lo (廣東話音)＂定還是＂Chen Bao Luo (普通話音)＂呢？就算聖經密碼真係出現＂Chan Po Lo＂，我都唔知會唔會係深圳的＂陳菠蘿＂。況且，舊約聖經三千幾年之前已經存在，唔通幾千年來，甚至往後一千年，世上就只得我一個叫陳保羅？
其次，”梅瑟五書／摩西五經“有成三十幾萬個字母，每隔ｎ個字母取一個拼埋，得出嘅訊息一定會係”…xyzxyzxyzCHANPOLOxyzxyzxyz…”訊息前前後後都會有好多無意思的字母。保羅又唔係名人，就算聖經密碼有我個名，都會被人當係無意思嘅字母。再者，今日2010年就話冇人識陳保羅啫，難保2047年我變成好出名，到時先被人喺聖經密碼發現出來。所以，就算聖經真係有密碼，永遠都只可以＂事後孔明＂。
幾千年來，好多地方名都改過好幾次，甚至移山填海，發現新大陸，有Ｄ地方以前根本唔存在。假設一千年前（即1010年）都有人發現聖經密碼，仲俾佢拼到＂彌敦道有金執＂，只可惜香港開埠之後先有彌敦道，雖然知道有金執都冇用。
同樣道理，一千年前嘅人唔知「燈泡」同「核子彈」係乜，亦唔識「雷曼兄弟」、「金融海嘯」等，佢哋就算拼到呢Ｄ字都唔明白影響有幾大。呢個情況今日都可能會出現，假設保羅喺2047年發明一種叫”陳保羅無敵死光砲”嘅大殺傷力武器，之後仲被人喺第三次世界大戰廣泛使用。雖然聖經密碼可能都拼到”陳保羅無敵死光砲”，但對2010年嘅人來講都冇意思。
總括來講，就算真係有聖經密碼，人類都唔可能靠佢未卜先知，因此意義不大。
聖經密碼簡介：
有Ｄ讀者可能聽過幾年前有本書叫“聖經密碼“，之後仲有續集”
聖經密碼２“。內容講一位數學家同一位物理學家喺舊約聖經嘅”梅瑟五書／摩西五經“發現聖經隱藏密碼，而且仲有預言性。”梅瑟五書／摩西五經“早在三千多年前已寫成，即係天主／上帝當時已經預知到好多近代發生嘅事。兩位學者用嘅方法係將希伯來原文聖經去除所有space bar，連貫成總長三十幾萬個字母。之後每隔ｎ個字母取一個並拼合起來，竟然發現好多有意思的字、人名等。
例如Rips ExplAineD thaT eacH codE is a Case Of adDing Every fourth or
twelth or fiftieth to form a word得出隱含訊息為READ THE CODE（每隔四個字母取一個得出的結果）
佢哋利用電腦重複上述方法，當一搵到關鍵字，會接著找相關訊息。例如找到關鍵字〝希特勒〞，跟著在附近找到〝惡人〞、〝納粹與敵人〞、〝屠殺〞等相關字。佢哋發現聖經密碼竟然找到「莫札特」是「音樂」的「作曲家」，「愛迪生」跟「電」和「燈泡」，「愛因斯坦」同「他推翻現有的事實」、「科學」、「預告一位聰明絕頂的人」、「嶄新而卓絕的知解」連在一起。有Ｄ事件，如日本1995年神戶大地震也在聖經密碼內預示：「日本神戶」、「火災與地震」、很大一個「5755」（5755年是猶太歷，相等於公元1995年）。聽落都幾神奇。當然任何一本書都可以搵到隨機字母組合，但支持的人話除聖經外，不論是十萬或百萬字母書籍，都不可能找到如此連貫訊息。
保羅隨便在網上找，有Ｄ人當然認為只係「撞采」或「靠估」。以前冇影印機，聖經都係靠手抄，我咃又冇最初第一份手稿，一旦抄錯一個字，成個訊息都會唔同曬。有Ｄ牧師、教友則認為天主／上帝既然愛世人，無必要將Ｄ嘢收收埋埋，如果仲有其他訊息，應該一早就講俾世人知，唔駛等到而家。
２０１０年１２月１１日
