好耐之前，有一日朝早起身，保羅發現床邊多咗本聖經。原來之前一晚，老婆話半夜訓覺聽到有怪聲，於是攞咗本聖經出嚟，打開放則邊。電視電影，成日都講彊屍驚十字架，鬼怪怕桃木劍。妖魔鬼怪既然可以神通廣大，仲識飛天盾地，又點會怕木頭造嘅十字架同劍？由細到大，每年呢個時候，保羅都會攞聖枝返屋企。曾經唔止一次聽過有人問，聖技係咪可以辟邪驅鬼。如果你真係撞鬼，而又靠聖枝搞得掂，保羅勸你記得要多謝呢枝樹枝背後嘅上主。
喺保羅認識之中，有好幾個妻子／女朋友都成功以自己無言嘅德行，感化到佢哋原先唔信上主嘅伴侶。反之，丈夫／男朋友能夠將信仰嘅智慧傳俾另一半，記憶中好似唔係太多。不過，美國有人做過統計，結果啱啱相反。家庭中，如果第一個領洗嘅係仔／女，只有3.5%最終全家跟隨。第一個係媽媽，有17%會全家受影響。但當爸爸係第一個，竟然高達93%。呢個統計有幾可靠，保羅唔知，不過似乎好多嘢，都唔可以話男人冇責任。
保羅細個讀天主教學校，每年復活節前嘅四旬期，老師都會喺班房傳個捐獻盒，叫我哋慳返啲零用錢捐畀有需要嘅人。「克己」，即係例如明明好想飲汽水，但克制忍住唔買，又或者改為飲清水平啲，捐出慳返嘅幾蚊。年紀大咗，對好多人嚟講，唔好話一千幾百，有能力嘅，甚至捐錢修橋整路，都冇乜問題。捐款數目大，可以惠及多啲人，當然係好事。不過，如果能夠為咗基督嘅原故，做小小犧牲，縱然只係捐得一個幾毫，當中嘅意義可能仲大。
之前，瑞士有人做過關於父母同仔女去教堂嘅統計。如果父母都唔去(non-practicing)，八成以上仔女第日唔會去。相反，兩個都經常去(regular)，得25.8%長大後會變咗完全唔去，三份一仲能夠保持經常去。但有趣嘅係，如果爸爸唔去，無論媽媽幾虔誠，都唔多過5%仔女肯經常去。相反，只要爸爸經常去，無論媽媽去唔去，超過三份一仔女將來會經常去。美國亦有類似統計，結果都差唔多。今時今日，去教堂嘅人越來越少，睇嚟真係要問，爸爸們，你哋去咗邊度？
唔知本欄男讀者有冇同感，保羅以前成日覺得，講宗教係一個好女性化、娘娘腔嘅課題。男人包袱多，尋求信仰，彷彿就會表露懦弱一面。保羅冇正式統計，但經驗所得，教會活動，似乎見到婆婆、嬸嬸、少女嘅機會，大過伯伯、叔叔、少年好多。坊間宗教書藉，分享個人感受嘅多，闡述事理嘅少。女仔多愁善感，富於言詞，容易為之觸動；相反男仔著重分析，難以體會他人經歷，對於太豐富嘅情感，有時甚至會反感。宗教如果單憑感性，容易被視為迷信；相反只求理性，只會變成知識／學科。
