再談高主教

除咗驅魔，高皓正亦試過分享關於戒自瀆嘅事。好多人就算平日好謙虛，唔鍾意認叻，甚至同人講自己點唔掂，其實心裡對「我」都有一定評價，因此，內心黑暗一面，例如自私、冇良心、魯莽、怕辛苦、貪得無厭、淫蕩、懦弱、妒忌等，唔想、亦唔肯面對，更加唔敢講人知。高皓正主教嘅言論，當時引起有好大迥響。其實，會唔會因為我哋都害怕見到自己黑暗嘅一面呢？

豐功偉績

好多人覺得成聖升仙，係好遙遠嘅事。一係就做過番豐功偉績，否則就要在世時慈悲濟世，功德無量。對普通人嚟講，資質能力有限，要造福人群，都唔係咁易。行善績德、助人互助、慷慨捐錢，固然都係好事。不過如果只識貢獻世界，滿口仁義，內心惡毒厚黑，就算可以幫到全世界人，甚至帶曬佢哋上天堂，但自己反而落地獄，結果都係徒然。

霸王餐

基督教只有天堂同地獄，而天主教認為兩者間仲有煉獄。意思係有啲人在世時做咗壞事，雖然有悔意，已得到寬恕，但仍要受罰，罰夠先有得升天堂。就好似食咗霸王餐冇錢畀，因為肯認錯，老闆唔拉你去差館，不過要洗夠碗先准走。保羅好多天主教朋友，都話唔奢望上天堂，但求唔落地獄，可以去煉獄都好好。有句說話叫「聖人都有錯」。同一般人諗法唔同，天主教／東正教嘅聖人，雖然有啲都有豐功偉績，貢獻世界，不過更重要係，佢哋都有好嘅德行，可以升天堂。如果係咁，以封聖為目標，都唔係好過份啫？

設身處地

身邊好多人都話如果有絕症／癱咗，寧願安樂死。天主教認為殺自己（自殺、安樂死）都係殺人、都係犯罪。保羅以前參加過一個探討活動。當中，有啲本身或家人患病／傷殘。有人激動地反對，斥責安樂死係怯懦，甚至話：「阿媽生你都痛，難道佢又唔生？」保羅唔係支持安樂死，但好人好者，唔會明患病嘅辛苦、醫藥費嘅壓力。到自己有事，可能一樣係咁諗。當然，了結生命，唔應該鼓勵。伯多祿／彼得都曾誇口話唔會出賣耶穌，到生死關頭，一樣面對人性軟弱。冇事冇幹，講風涼話，指責人好易。當殺到埋身，邊個可以擔保自己唔會一樣？