聖誕樹節

記得好多年前聖誕，電視新聞喺大陸採訪，問一個路人知唔知當日紀念邊個出世，佢反問係咪聖誕老人。今時今日，好多節日都變咗催谷人買嘢嘅藉口。過時過節，舖頭、商場一定滿佈裝飾。但當聖誕節變成聖誕樹節，復活節變成復活蛋節；開派對慶祝耶穌生日，竟然忘記咗壽星公，會唔會有一日，當被人問今日紀念邊個復活，我哋會答係兔仔呢？

螢光幕

自從有咗手機同平板電腦，人靜默嘅時間越來越少，坐地鐵、等巴士、排隊、塔𨋢，有一秒鐘停落嚟就即刻揼低頭。細路、後生仔，甚至大人、中年都一樣。聽歌、打機、發短訊、上臉書，每分鐘都機不離手。就算唔攞出嚟，月台、車箱、𨋢口好多都裝咗電視。當然，以前冇手機，好多人得閒其實都係發吽哣。但除咗靜默嘅時候，保羅自問唔識一面對著螢光幕，一面接觸自己嘅靈魂。

除此以外

曾經睇過一篇文話，香港人除咗用錢之外，越來越唔識點樣表達愛同關心。越肯花錢喺仔女度，代表越錫佢哋；孝順視乎俾幾多錢家用；男女間肯送幾貴嘅嘢俾對方；善心係捐過幾多錢。最近，保羅收到一個短訊，關於佛教認為除咗錢，七種施捨方法，希望同大家分享。（一）顏施：和顏悅色，以微笑處事；（二）言施：多講鼓勵、讚美同安慰嘅話；（三）心施：為人設想，體貼眾生；（四）眼施：以慈祥、善意、和氣嘅眼神對人；（五）身施：以行動幫人；（六）座施：讓座俾有需要者；（七）察施：唔駛對方出聲，察覺到他人嘅需要，為佢行個方便。

機關算盡

耶穌臨死前，左右有兩個賊一齊釘十字架。一個寸耶穌，另一個承認過錯，求耶穌記得佢。結果耶穌俾佢同自己一齊升天堂。一生肆無忌憚，賺盡不義之財，享受色慾歡愉，凡事自己為先，妄顧他人，攞曬各種好處。最後，臨死前一分鐘懺悔，升埋天堂。冇錯，信仰就係咁著數、咁唔公平。好可惜，廣告都有教，拒絕毒品，「不可一，不可再」。罪惡就好似吸毒咁，越吸得耐，傷害越大，越難戒得甩。能夠喺最後一刻懺悔，談何容易。

陰魂不散

鬼怪，好多人都怕。就算把口話唔驚，當喺陌生環境，三更半夜，自己一個，都可能會不寒而慄。「寧可信其有，不可信其冇」。七月十四梳起髮陰；入到酒店房講「唔好意思」，搬新屋前拜四角。不幸地，上述嘅事，連好多教友（包括天主教同基督教）都會做。當然，如果恃著有信仰，想試探耶穌，專登接觸邪靈，死咗都無得怨。不過既然有真理做腰帶，正義作盔甲，信德做盾牌，如果都仲驚，係咪應該檢討吓平日有冇著好自己副武裝？

３．４６秒

細個讀物理學過計加速率同時間，知道一個人由２０樓跳落街，大約要３．４６秒。十誡中嘅殺人罪（天主教第五誡／基督教第六條）包括自殺。好多年前，保羅去一個基督教朋友喪禮。當時心諗，為佢祈禱都又有咩用，因為自殺升唔到天堂。直到最近先明白，自己唔係信仰判官，唔應該判斷他人，免得反被判斷。但願３．４６秒足夠佢真心痛悔。

心中的加里肋亞

加里肋亞／加利利湖(Sea of Galilee)係位於以色列北部嘅淡水湖，大約有166平方公里（同大嶼山差唔多大）。相傳耶穌喺嗰度召叫第一批門徒。據聖經講，耶穌復活後，有幾個女人去到墳墓，發現屍體唔見咗，有天使顯現，叫佢哋返去加里肋亞／加利利搵耶穌（由耶路撒冷揸車去大約要３個鐘）。返去加里肋亞／加利利代表回到起點，由頭開始，重溫上主召叫我哋嘅一刻。每個人心中都有一個加里肋亞／加利利，但我哋仲記唔記得佢係點樣嘅呢？

信耶穌得水牛

永生睇唔到又唔食得落肚，信仰帶嚟嘅平安同喜樂，只可親身感受，好難單靠人哋講而體會。去車公廟轉風車，求好運；向觀音借富，希望少勞多得；甚至拜姻緣石，搵個好男／女人。拜神信佛，除咗為物質需要同切身利益，係咪就冇其他？好多年前聽過一件真人真事。一個招牌原本寫著「信耶穌得永生」，可惜日久失修，「永生」變成「水牛」。如果信耶穌真係得水牛，保羅估計每逢聖誕復活，間間教堂肯定排曬長龍。

其身不正

小朋友做錯事，最鍾意用嘅藉口就係「阿哥都係咁」，甚至「媽咪都係咁」。教仔女過馬路守交通規則，但有幾多父母夠膽話自己由細到大冇衝過紅燈。外人對有宗教者都有較高道德期望，一旦佢哋行差踏錯（例如陳志雲被告上法庭、朱茵未婚懷孕、神職人員性醜聞等），就會話佢哋虛偽、其身不正，冇資格對人指指點點。無行為嘅信仰係死嘅。但正如細路仔賴媽咪一樣，到底係痛心他人劣行，定係俾自己黑暗一面嘅開脫，拒絕改正嘅藉口呢？

預知未來

人人都想未卜先知，尤其下次六合彩開咩冧把、邊隻股票會爆升。「Prophet」中文叫「先知」都真係譯得幾差，搞到個個以為先知淨係講預言，其實應該係傳遞上主說話嘅人至真。佢哋唔一定只係講預言，更重要係指出所身處時代唔公義嘅事。有啲預言，應該似警告多啲。就如叫小朋友做功課，如果唔係聽日老師會罰一樣。被選中做先知，通常都幾慘。例如厄則克耳／以西結不但要坐監，又有一排啞咗講唔到嘢，之後一年幾訓咗喺地下唔郁得，仲要食牛屎烤餅。伊斯蘭教視其他宗教嘅聖者都係先知。因此，不單可蘭經有提及嘅梅瑟／摩西、耶穌，連佛祖、孔子都可能係先知。今時今日，唔係個個都可以講預言，但擁有先知之恩，代表自己有少少智慧，識得話人哋唔啱。但無論幾叻都好，最終都會消逝（死亡、腦退化等），只有愛先係永恆不息。

希望到時唔駛坐監啦...

發毒誓

睇電視（尤其古裝片），啲人為咗得到信任，好多時都會發毒誓，例如天打雷劈、絕子絕孫。鬼佬成日笑中國人迷信，因為我哋做事／說話有不少避忌，好似大肚婆驚小氣，頭三個月唔可以講俾人知；過年唔准買鞋等。外國亦有類似嘅嘢：法國人開香檳，最後一啖通常都留返俾已婚嘅長輩飲；因為佢哋認為邊個飲咗，嗰年就會結婚。面對呢啲事，彷彿個個都有特異功能，可以一句說話、一個行為控制命運，掌管生死。但往往忘記，除咗喺髮型屋，冇人能夠指著天講一句說話，而令自己一條頭髮變白。

防疫針

好多人誤解宗教，以為好似防疫針，打咗就百毒不侵，一世虔誠，唔再犯罪。萬一仍然行差踏錯（有時甚至係神職人員），就梗係枝針冇效，既然如此，駛乜信教。其實信仰只係指條路你行，唔掂時可以搵人（神）幫手。打個比喻，由中環去小西灣，要經軒尼詩道、英皇道、柴灣道等。但教咗你唔等於去到終點，因為你仍有權揀唔行、特登倒轉行、甚至行行吓被其他嘢（誘惑）吸引，去咗第二度。所以去唔去到小西灣，要一生努力。試諗吓，出賣耶穌嘅猶達斯／猶大都係日日同佢一齊。當然，冇信仰，可以賴自己唔識，信咗教仲明知故犯，就罪加一等。

電燈制（三）

如果原始人嚟到現代，第一次見到㩒電制會著燈，一定以為呢個係神蹟，檔我哋神咁拜。但當佢發現原來盞燈邊個㩒都一樣，相信就唔會再檔係一回事。神蹟，我見過，而且唔只一次。保羅同好多人一樣，試過身邊好愛好尊敬嘅人有病，希望為佢祈禱有奇蹟令佢好翻，但結果佢都係死咗。諗返轉頭（雖然唔知啱唔啱），如果個個祈禱就一定要有神蹟，同㩒電制就會開著盞燈有乜分別？當變成理所當然，我哋仲會唔會檔神蹟係神蹟？

電燈制（二）

有祈過禱嘅（包括保羅自己）應該都有類似經驗，苦苦哀求但都係得個吉。好多人（保羅當年一樣）都會好失望，覺得祈禱冇用。明明又話求就會俾我哋，敲門就開俾你，需要幫手嗰陣，就冇料到。呢個問題可能真係上主自己先識答。不過保羅成日諗，仔女想要麵包，父母唔會俾石頭佢；想食魚，唔會擰條毒蛇出嚟。但係我哋係咪肯定自己想要嘅，係麵包唔係石頭，無理由你話要毒蛇都照俾你。甚至好似小朋友好鍾意飲汽水咁，見你咳到死，仲俾你飲。

電燈制（一）

之前睇過一齣大陸劇，個女仔問有信仰嘅男主角：「我唔係信徒，都可以祈禱咩？」相反地，無論天主教定基督教，都有好多掛名教友，叫佢哋祈禱，仲衰過對牛彈琴。通常，藉口都話冇時間。雖然有啲不敬，不過保羅以前住１８樓時，試過朝早等𨋢，喺心裡面都唸咗３次天主經／主禱文。保羅估計，抗拒祈禱，其中一個真正原因，係好多人覺得自己所言所行，有愧於心，冇面目面對上主。但係，有病嘅人先需要睇醫生，越係犯得多罪，越更加應該祈禱。

現眼報

中國人有句說話「若然不報，時辰未到」。但現實中，報紙成日寫「好老師暴弊」、「孝順仔慘死」。相反，身邊嘅真小人／偽君子，個個好食好住，鴻運當頭。有人覺得天冇眼，好心冇好報。甚至早前佛山小悅悅事件，嗰十八個扮睇唔到，掂行掂過嘅，可能今日都安然無恙。但正如公司年尾要交業績，人都一樣，做過講過乜嘢，最終都要埋單計數。嗰啲我哋有虧負過嘅，有一日都會出翻嚟，成為指控我哋當日所作所為嘅最佳証人。

"性"人"性"女

好多宗教都有提及「性」。將某啲視為罪惡，有啲就冇問題。唔同人唔同宗教，界線唔同。有人覺得十惡不赦嘅，有人話無所謂，甚至冇咗會死。領咗洗唔代表百毒不侵，一樣可以係「性」人。強姦、非禮唔係個個敢，但睇三級片、手淫、婚前性行為、外遇、離婚再婚、濫交、甚至召妓、同性戀，往往講中好多教友（不論男女）鮮為人知嗰面，甚至係內心最大嘅矛盾。十五世紀有傳教士喺剛果，原本同個酋長幾好傾，一話要放棄三妻四妾，即刻反面。現代社會，「性」被視為人權象徵。唔准「做」，就係剝奪自由。其實，二千年前希臘已經有人話「我哋乜都做得」。伊斯蘭教有句聖訓：「罪惡係嗰啲纏繞你心靈，但又唔敢講人知嘅事」。眾多誘惑之中，形容「性」應該最貼切。

同人唔同命

每個人天生條件唔同。有含住金鎖匙出世嘅，亦有溫飽都成問題嘅。點解佢樣靚又聰明，我就勞碌半生一事無成？羨慕甚至妒忌，往往因而產生。聖經將人嘅才能比喻為攞住幾多個金幣做生意；擁有越多，孭條數就越大。若然只得一個，恭喜你，因為賺到一個已經夠交差。相反，如果揸住十個金幣，就更應擔心自己有生之年，係咪可以賺得返十個。

另類關二哥

菲律賓係天主教國家，但大小舖頭都設有神臺。不過，佢哋唔係放關二哥，而係耶穌聖嬰像，側邊仲要擺杯水。保羅亦試過喺俄羅斯坐的士，軑盤前唔係平安符，而係聖母相。呢啲店主／司機可能同我哋一樣，唔係想學關羽義薄雲天嘅榜樣，只係想生意興隆、一帆風順。面對未知嘅環境（如生意好壞、路面交通），求神保佑，係人之常情。好多人認為行衰運，唔係惡鬼纏身，就係做得陰質嘢多有報應。賞善罰惡，其實係舊約嘅思想。聖嬰像／聖母相應該係提醒自己唔好忘記上主，陷入罪惡。冇人保証領咗洗就會有求必應，否則黃大仙可能仲靈。年青一代往往視鬼神為老套、迷信。表面上乜都唔信，實際上只係用其他嘢（塔羅牌、星座、神秘力量等）去填補心靈嘅空虛。

管中窺豹（三）

除咗聖經本身，其他相關嘅嘢，亦好多時成為攻擊對象。例如喺意大利都靈嘅聖殮布，相傳曾經包住耶穌屍體，不過碳１４測試話係十三世紀嘅產物。又好似前幾年，有基督教團體喺土耳其亞拉臘山聲稱搵到諾厄／挪亞方舟嘅殘骸，事後有人話佢哋造假。就算聖殮布係偽造，方舟洪水冇事實根據，如果因此就被動搖，我哋係咪應該諗吓自己信嘅係一塊布、一艘木船，定係佢哋背後象徵嘅上主呢？

森巴過後

巴西嘉年華會舉世聞名，但唔係人人知道其實同守齋有關。巴西係天主教國家，每年復活節前四十日叫做四旬期（「旬」代表十日），當中著重克己（克制自己各種慾望，如飲食、物質、性等）。一方面紀念基督嘅苦難，另一方面使人學習控制慾望，對抗誘惑。嘉年華英文Carnival中「Carni-」其實同食肉有關，例如肉食動物Carnivore，犬齒Canine等。嘉年華原先係等人喺守齋前盡情放肆，狂食肉，後來慢慢變成今日咁。比起好多地方，香港社會富裕。有咗錢，想食好啲，用好啲係人之常情。不過除咗森巴女郎，係唔係都應該諗吓背後嘅意義呢？

管中窺豹（二）

有人亦鍾意攻擊聖經中唔合倫理嘅章節，尤其涉及亂倫、暴力、性等。就算教友（包括保羅自己），有時都會犯類似毛病，攞住一句半句，就視為教理，指責他人。其實，除咗字面，人好容易忽略整體意思，因為唔係個個有耐性睇晒全章，甚至成本聖經。試諗吓，福音都叫人隻眼犯罪，就挖出嚟掉咗佢；手腳犯罪，要斬咗佢。如果真係咁做，身體仲有邊部份可以留底呢？

管中窺豹（一）

攻擊聖經最常用嘅，係創世紀違反大爆炸同進化論，所以唔科學，否定其價值。呢種講法，其實反映對聖經唔認識。創世紀全卷５０章，創造天地喺第一章，佔全卷２％。新舊約合共７３卷（天主教）／６６卷（基督教），創世紀係其中之一。如用頁數計（以保羅嗰本為例），全本聖經１９７６頁，創世紀得７１頁（約３・６％），點解淨係講佢呢？如果要數聖經唔科學之處，保羅隨手可以舉幾度，例如依撒意亞／以賽亞先知使太陽倒後行（列下２０：８－１１）；搬約櫃過約旦河嘅人，隻腳一踩落去，河水就即刻停低唔郁（蘇／書３：１４－１７）。另外，通常只係故事性部份先會被攻擊，其他書卷，好似箴言、米該亞／彌迦書、費肋孟／腓利門書等，提都冇人提，好明顯因為得好少人睇過。

家傳戶曉

全世界７０億人，１６億係伊斯蘭教，天主教有１２億。如果話歷史上最高銷量嘅書係聖經同可蘭經，應該冇異議。至於第三位係乜，保羅先賣個關子，文尾開估。但買咗唔等於有睇，筆者屋企大把書，數以十年都未揭過。相反，除非中毒，網頁應該都係主動開嚟睇。全球網頁之中，一如所料頭幾位都係谷歌、面書、Ｙｏｕｔｕｂｅ等。伊斯蘭教、天主教、甚至基督教網頁竟然連頭一百都入唔到，反而咸網就有幾個。好多人（基督教通常好啲，天主教尤甚）屋企本聖經都係買嚟擺。除咗家傳戶曉嘅故事（如五餅二魚、過紅海等），唔好話內文，連目錄都未必講得出。最後，歷史上第三本最高銷量嘅書，有人估計係毛語錄。

陳保羅對陳保祿

筆者雖然係天主教，不過當年改筆名，特登唔用「保祿」（天主教翻譯）用「保羅」（基督教翻譯）。天主教同基督教，成日被人覺得水火不容，因為各自都有激進派，鍾意攻擊對方。呢啲批評，好多時反而係基於對自己嗰邊嘅唔認識，加上以訛傳訛造成。但係無論「保祿」定「保羅」都冇為人死喺十字架上。如果我哋死咗，耶穌究竟會問我哋信天主教定基督教，還是問我哋信唔信佢呢？

高主教

早排，高皓正因為幫人驅魔，被網民笑佢做「高主教」。不過，呢啲事都係唔好亂嚟，搵返神職人做好啲。宗徒大事錄／使徒行傳就有一個故仔係咁：話說保祿／保羅出去傳教，有七兄弟聽咗半桶水，就去也文也武。遇到一個被附魔嘅人，七兄弟同佢講：「我因保祿／保羅所宣講嘅耶穌之名，命你離去！」點知，個附魔者竟然答佢哋話：「耶穌我識，保祿／保羅我都識，但你係乜水呀？」結果七兄弟被佢打鑊金（記住係一個打七個），仲被剝光豬，落荒而逃。感覺上，喺驅魔方面，基督教做得好啲，天主教就似乎越來越唔重視。聽講香港天主教教區都有驅魔組，不過已經廿幾年冇出動過。筆者估計，唔係因為香港特別太平，而係啲人（甚至教友）寧願信風水師，都唔信神職人員。