馨苓蛋白質（十六）

陳保羅教（二）

好多人都會上網接收資訊。曾經睇過一篇有關美國民主共和兩黨支持者嘅文章，話依家雙方擁躉敵對、覺得對方嘅意見廢話、互相當大家仇人嘅情況越來越嚴重。原因係臉書、推特等會根據每個人之前睇過嘅，分析喜好，擺前啲、擺多啲鍾意嘅佢睇。久而久之越來越少睇到對方嘅理據，造成仇恨日深。香港有所謂黃藍之爭，而且仇恨越來越深。大家都話對方錯，甚至認為係罪惡、魔鬼。曾經聽過一個牧師話（冇錯，係牧師唔係神父），我哋要討厭嘅係罪惡，但要愛嘅係罪人。當我哋好憎某啲人，好想消滅對方嘅時候，我嘅仇視嘅究竟係佢嘅所言所行，定係嗰個人本身呢？

馨苓蛋白質（十五）

陳保羅教（一）

保羅好少喺本欄講政冶。近年因為政治立場唔同，導致好多人同自己身邊嘅人反目。甚至有人因為唔鍾意某啲宗教領袖嘅政治取態，對嗰個宗教反感、離棄、攻擊。不過無論陳日君，鄺保羅定朱耀明都只係人，都有機會犯錯。我哋係咪應該分清楚，自己信嘅到底係天主、基督，定係「陳日君教」、「鄺保羅教」或者「朱耀明教」呢？

馨苓蛋白質（十四）

憤怒小鳥（二）

保羅同好多人一樣，對身邊／社會上有啲人嘅行為／言論，好反感，覺得佢哋無恥、卑鄙、討厭。認定呢啲係壞人，周圍唱衰佢哋嘅劣行；見佢前面，憎埋後面；希望佢哋有一日畀天收、有報應。如果對方改過，固然係好事；但就算佢冥頑不靈，係咪就代表要嬲佢一世？雖然好多時未必分得開，但我哋要憎恨嘅只係罪惡，而唔係罪人。七宗罪其中一項係「憤怒」。如果心裡面懷著仇恨，會唔會自己其實都係罪惡嘅一分子？

馨苓蛋白質（十三）