防疫針

好多人誤解宗教，以為好似防疫針，打咗就百毒不侵，一世虔誠，唔再犯罪。萬一仍然行差踏錯（有時甚至係神職人員），就梗係枝針冇效，既然如此，駛乜信教。其實信仰只係指條路你行，唔掂時可以搵人（神）幫手。打個比喻，由中環去小西灣，要經軒尼詩道、英皇道、柴灣道等。但教咗你唔等於去到終點，因為你仍有權揀唔行、特登倒轉行、甚至行行吓被其他嘢（誘惑）吸引，去咗第二度。所以去唔去到小西灣，要一生努力。試諗吓，出賣耶穌嘅猶達斯／猶大都係日日同佢一齊。當然，冇信仰，可以賴自己唔識，信咗教仲明知故犯，就罪加一等。