除此以外

曾經睇過一篇文話，香港人除咗用錢之外，越來越唔識點樣表達愛同關心。越肯花錢喺仔女度，代表越錫佢哋；孝順視乎俾幾多錢家用；男女間肯送幾貴嘅嘢俾對方；善心係捐過幾多錢。最近，保羅收到一個短訊，關於佛教認為除咗錢，七種施捨方法，希望同大家分享。（一）顏施：和顏悅色，以微笑處事；（二）言施：多講鼓勵、讚美同安慰嘅話；（三）心施：為人設想，體貼眾生；（四）眼施：以慈祥、善意、和氣嘅眼神對人；（五）身施：以行動幫人；（六）座施：讓座俾有需要者；（七）察施：唔駛對方出聲，察覺到他人嘅需要，為佢行個方便。