另類關二哥

菲律賓係天主教國家，但大小舖頭都設有神臺。不過，佢哋唔係放關二哥，而係耶穌聖嬰像，側邊仲要擺杯水。保羅亦試過喺俄羅斯坐的士，軑盤前唔係平安符，而係聖母相。呢啲店主／司機可能同我哋一樣，唔係想學關羽義薄雲天嘅榜樣，只係想生意興隆、一帆風順。面對未知嘅環境（如生意好壞、路面交通），求神保佑，係人之常情。好多人認為行衰運，唔係惡鬼纏身，就係做得陰質嘢多有報應。賞善罰惡，其實係舊約嘅思想。聖嬰像／聖母相應該係提醒自己唔好忘記上主，陷入罪惡。冇人保証領咗洗就會有求必應，否則黃大仙可能仲靈。年青一代往往視鬼神為老套、迷信。表面上乜都唔信，實際上只係用其他嘢（塔羅牌、星座、神秘力量等）去填補心靈嘅空虛。