高主教

早排，高皓正因為幫人驅魔，被網民笑佢做「高主教」。不過，呢啲事都係唔好亂嚟，搵返神職人做好啲。宗徒大事錄／使徒行傳就有一個故仔係咁：話說保祿／保羅出去傳教，有七兄弟聽咗半桶水，就去也文也武。遇到一個被附魔嘅人，七兄弟同佢講：「我因保祿／保羅所宣講嘅耶穌之名，命你離去！」點知，個附魔者竟然答佢哋話：「耶穌我識，保祿／保羅我都識，但你係乜水呀？」結果七兄弟被佢打鑊金（記住係一個打七個），仲被剝光豬，落荒而逃。感覺上，喺驅魔方面，基督教做得好啲，天主教就似乎越來越唔重視。聽講香港天主教教區都有驅魔組，不過已經廿幾年冇出動過。筆者估計，唔係因為香港特別太平，而係啲人（甚至教友）寧願信風水師，都唔信神職人員。