Document 1

保羅細個，有時會整蠱其他朋友仔，同人講講吓嘢，突然話「耶穌喺你後面喎」，嚇到對方好驚咁向後望。大部份人一生冇見過神，最多只係透過一啲經歷，感受到佢存在。唔信有神嘅，一般都話因為冇見過。對其他人嘅見証，認為係心理作用、巧合、潛意識等。亦有啲人，原本唔信，當見過神跡、異象、甚至耶穌顯現後，從此改變咗。如果有信德，每次見到祝聖嘅麵餅，耶穌已經喺我哋面前；如果有信德，兩三個人一齊祈禱，佢就喺中間。但冇信德嘅話，就算佢喺你面前顯現，都會以為撞鬼。