刀山火海

唱情歌成日都講犧牲，為情人，可以點偉大、點轟烈。現實中，唔好話要生要死，就算雞毛蒜皮，真係要做時，會唔會改口話有心無力？小朋友成屋玩具，講笑叫佢送個陀螺畀我，可能最多只肯攞個爛嘅出嚟。無關重要，梗係冇所謂，要入肉入心時，有幾多人肯？唔痛，又點算犧牲？「人人為我，理所當然；我為人人？咪搞！」可能係好多人唔敢講出口嘅心聲。「人單獨不好」唔淨止因為悶、冇人傾偈冇人陪。得一個人嘅話，點會學識體諒、包容同犧牲？