擁有哈巴谷之恩

舊約其中一位先知哈巴谷，相傳好有音樂造詣，係聖殿中嘅樂師。保羅曾經喺彌撒度見過由一班癱瘓、痙攣、智障人士組成嘅歌詠團，雖然唔算好好聽，不過睇見佢哋唱每一個音，都要出盡九牛二虎之力，真係令人幾感動。細個讀經濟科，學過「比較優勢 (Comparative Advantage)」。個個人唔同嘅長處，天主教叫做「神恩」。雖然未必好超卓、世界冠軍，但無論係傷殘人士定哈巴谷，只要盡自己擁有嘅，一樣可以服務上主。