冇天理

聖經寫耶穌小朋友時嘅事好少，只知佢阿爸若瑟做木匠。喺當時，只有有錢人先會用木製傢俱，一般人求其用舊石或爛木做枱凳就算。由於服務嘅都係有錢客戶，佢屋企應該唔會太窮，可能係小康添。不過畀客拖數唔係今日先有，兩千年前，交咗貨收唔到錢，兼被打一身應該係好平常嘅事。保羅諗，如果自己係若瑟遇到呢啲事，會唔會好委屈，覺得冇天理，甚至有一刻對上主氣餒、失望呢？雖然上主就喺屋企，等佢放工返嚟。小朋友嘅耶穌，見到唔開心嘅阿爸，到底會好窩心咁錫返佢一啖，定係只會大叫大嚷，叫人同佢唱歌歌，畀佢食零食呢？保羅想講嘅係「冇天理」唔係今日先有，即使上主與我哋同在，唔代表就會事事都「有天理」，因為負責定有冇天理嗰個，唔一定要今世就計清條數。