庸才定人才

好多人都知，天主教同基督教其中一個分別，就係神父冇得結婚，但做牧師可以。神父唔結得婚，因此，順理成章主教都係單身。不過喺東正教，情況好唔同。神父可以揀結唔結婚，但主教就一定要係單身。因此，主教只可以喺獨身或老婆已經死咗嘅神父中選出。保羅冇正式研究過，但網上資料話，雖然守獨身喺東正教受到崇高尊敬，但九成神父都會結婚。於是有人問，咁樣會唔會限制咗可以成為主教人選嘅人才庫（Talent Pool）？但係，如果要講人才，耶穌一開始就揀晒啲又醒又高學歷嘅人做門徒啦，點會輪到啲冇乜讀過書嘅漁夫呢？（十二門徒中，起碼有五個係漁夫：大雅各伯／雅各、伯多祿／彼得、安德肋／安德烈、若望／約翰、斐里伯／腓力）