冇膽匪類（一）

曾經聽過一個伊斯蘭教故事，內容大意話，一個好靚仔嘅青年去城市搵工。喺街上遇到個闊太，表示肯請佢做嘢，人工仲好高添。點知去到個闊太屋企，佢即刻面口變哂，將個青年反鎖喺睡房，慾火焚心地撲落個青年度，想拉佢上床尋歡。個青年好驚，因為知道男女姦情係大罪，真主唔會饒恕。於是心血來潮，話好急要去廁所。佢入到廁所，就即刻喺馬桶撈起幾把糞便，抹到自己成身臭味出返去。結果畀個闊太趕走咗，仲要好耐先洗返乾淨。雖然故事中嘅青年好似好細膽、好冇用，不過現實生活中，又有幾多個人有勇氣做一個懦弱嘅人？