飽暖思淫慾

好多無神論者都會話，如果上主係仁慈嘅，點解咁多天災人禍，令無辜者受害。呢個問題連教宗都唔識答（參考方濟各２０１５年１月１５至１９日訪問菲律賓時，與一名女孩對話），保羅當然唔敢認叻。不過，所謂「飽暖思淫慾」，人就係咁犯賤，無憂無慮時好容易就會忘記上主，生死關頭先識「臨急抱佛（主）腳」。上主無保證日日都係天晴，信仰本身就唔係只睇現世生命嘅幸福美滿，虔誠唔係趨吉避凶嘅護身符（十二門徒中除咗若望／約翰，十一個都係慘死）。保羅成日都諗，如果每個人都豐衣足食，我哋又點識同情憐憫，仲邊需要幫助其他人。